काठमाडौँ — सन् २०१५ मा आजकै दिन (मार्च २९) मा अस्ट्रेलियाले न्युजिल्यान्डलाई हराउँदै पाँचौं पटक पुरुष क्रिकेट विश्वकपको उपाधि जितेको थियो । एकदिवसीय फर्म्याटको उक्त विश्वकप अस्ट्रेलिया र न्युजिल्यान्डले संयुक्त रूपमा आयोजना गरेका थिए ।
फेब्रुअरी १४ देखि मार्च २९ सम्म आयोजित यो ११ औं विश्वकप थियो । ब्रेन्डन म्याकुलम कप्तान रहेको न्युजिल्यान्डले सबै विकेट गुमाउँदै १ सय ८४ रनको लक्ष्य दिएको थियो । अस्ट्रेलियाले ३ विकेट गुमाउँदै उक्त लक्ष्य भेट्टाएको थियो । त्यस क्रममा अस्ट्रेलियाका कप्तान माइकल क्लार्कले ७४ रन बनाएका थिए ।
फाइनल खेल अस्ट्रेलियाको मेलबर्न क्रिकेट ग्राउन्डमा खेलाइएको थियो, जहाँ ९३ हजार दर्शक उपस्थित थिए । प्रतियोगितामा १४ देशका क्रिकेट टोली सहभागी थिए, जसलाई दुई समूहमा विभाजन गरी खेलाइएको थियो । अस्ट्रेलियाका बलर मिचेल स्टार्क ‘प्लेयर अफ द सिरिज’ घोषित भएका थिए । अस्ट्रेलिया क्रिकेटतर्फ सर्वाधिक विश्वकप जित्ने टोली हो । यो प्रतियोगितासँगै अस्ट्रेलियाले सन् १९८७, १९९९, २००३, २००७ मा पनि विश्वकप जितेको छ । अस्ट्रेलियाले एक पटक सन् २०२१ मा टी–२० विश्वकपको उपाधि पनि जितिसकेको छ । अस्ट्रेलियापछि भारत र वेस्ट इन्डिजले दुई–दुई पटक एकदिवसीय फर्म्याटको पुरुष क्रिकेट विश्वकपको उपाधि जितेका छन् ।
प्रकाशित : चैत्र १५, २०७९ ०७:३८
