न्यु साउथ वेल्समा लेबर पार्टीको जित
अस्ट्रेलिया — न्यु साउथ वेल्समा १२ वर्षपछि विपक्षी दल लेबर सरकारमा फर्किएको छ । शनिबार सम्पन्न निर्वाचनमा लिबरल कोअलिसनलाई पराजित गर्दै लेबरले जित हासिल गरेपछि १२ वर्षसम्म विपक्षीमा बसेको लेबरले सरकार बनाउने पक्का भएको हो ।
स्थानीय समाचारमा जनाइए अनुसार ९३ सांसद संख्या रहेको तल्लो सदनमा बहुमतको सरकार निर्माणका लागि आवश्यक पर्ने ४७ संख्या लेबरले जित्ने उल्लेख छ । मतगणना भइरहेका कारण यथार्थ नतिजा सार्वजनिक भइसकेको छैन । यद्यपि अस्ट्रेलियामा हुने संसदीय निर्वाचन मुख्य गरेर विद्युतीय प्रणालीबाट हुने र प्रारम्भिक नजिता निर्वाचनकै दिन अनुमान गर्ने गरिएको छ । एबीसीका निर्वाचन विश्लेषक एन्थोनी ग्रिनले समेत लेबरले बहुमत सरकारका लागि आवश्यक पर्ने सिट संख्या लेबरले जित्ने अनुमान गरेका छन् । यसपटक निर्वाचनको दिनअघि नै १० लाख बढी मतदाताले अग्रिम रुपमा मतदान गरेका थिए भने लाखौं मतदातालाई हुलाकमार्फत समेत मतपत्र पठाइएको थियो ।
निर्वाचनमा जित हासिल गरेसँगै लेबरका नेता क्रिस मिन्स यस राज्यको प्रिमियर बन्ने पक्का भएको छ । ४३ वर्षीय लेबरका नेता पूर्व अग्निनियन्त्रक हुन भने उनले आफू जनताको हकहित र सुरक्षाका लागि सरकार निर्माणका लागि तयार भएको बताएका छन् । उनले धेरै चुनौती र अवसर रहेको बताउँदै लेबर यसका लागि तयार रहेको बताएका छन् । वर्तमान प्रिमियर तथा लिबरल नेता डोमिनिक पेरोटेले लेबर नेता मिन्सलाई शुभकामना दिएका छन् । हारसँगै लिबरल नेता पेरोटेले पार्टी नेताबाट राजीनामा दिएका छन् । उनले यस राज्यमा लिबरलले बेहोर्नुपरेको हारको जिम्मेवारी लिँदै पार्टीको नेतृत्वबाट हट्ने जनाएका हुन् ।
यसपटक न्यु साउथ वेल्सको निर्वाचनमा उम्मेदवार बनेका दुई नेपालीमूलका उम्मेदवारले विपक्षीलाई कडा चुनौती दिएपनि जित भने हासिल गर्न सकेनन् । एबीसीमा उपलब्ध निर्वाचन नतिजा अनुसार लेबर पार्टीबाट उम्मेदवार बनेका एलेक्स कार्कीले लिबरलका रे विलियम्ससँग हार बेहोर्ने देखिएको छ भने लिबरलबाट उम्मेदवार बनेकी ज्योप्सना पौडेलले ग्रेग वारेनसँग हार बेहोर्ने देखिएको छ । यद्यपि कार्की उम्मेदवार बनेको केलिभिल निर्वाचन क्षेत्रको करिब ६५ प्रतिशतमात्र मतगणना भएको छ भने पौडेल उम्मेदवार रहेको क्याम्पेलटाउन निर्वाचन क्षेत्रको करिब ५० प्रतिशत मात्र मतगणना भएको कारण अन्तिम नतिजा भने आइसकेको छैन । अहिलेसम्म केन्द्रीय राजनीतिमा सफलता हासिल नगरेपनि नेपालीको उपस्थिति यहाँको राजनीतिमा पछिल्लो समयाम दरिलो बन्दै गएको छ ।
