दिगो आर्थिक विकासको लक्ष्य पूरा गर्न निजी क्षेत्र र वित्तीय संस्थाको सहकार्य आवश्यक छ : प्रधानमन्त्री दाहाल

कान्तिपुर संवाददाता

काठमाडौँ — प्रधानमन्त्री पुष्पकमल दाहालले मुलुकमा दिगो आर्थिक विकासको लक्ष्य पूरा गर्न निजी क्षेत्र र वित्तीय संस्थाहरूको सहकार्य आवश्यक रहेको बताएका छन् ।

शुक्रबार काठमाडौंमा भएको 'इन्टरनेसनल कन्फ्रेन्स अन फाइनान्सिङ फर नेपाल' कार्यक्रमलाई सम्बोधन गदै प्रधानमन्त्री दाहालले सरकार दिगो विकासका लागि वित्तीय संस्था, विकास साझेदारहरू र निजी क्षेत्रसँग प्रभावकारी साझेदारी गर्न उत्सुक रहेको उल्लेख गरे ।

सरकारले दिगो विकासका लक्ष्यहरू पूरा गर्न लगानी आवश्यक पर्ने मुख्य क्षेत्रहरू पहिचान गरिरहेको प्रधानमन्त्री दाहालले बताए । दिगो विकास लक्ष्य पूरा गर्नको लागि भौतिक पूर्वाधार, ऊर्जा, पर्यटन, कृषि र उत्पादन समावेश रहेको प्रधानमन्त्री दाहालले बताए । नेपाल दिगो समाधानमार्फत लगानीको खाडल पूरा गर्ने प्रयासमा रहेको उनको भनाइ छ । प्रधानमन्त्री दाहालले सरकार विदेशी लगानी आकर्षित गर्नका लागि अन्तर्राष्ट्रिय साझेदारहरूसँग काम गर्न प्रतिबद्ध रहेको बताए ।

‘विकास लक्ष्यहरू हासिल गर्ने हाम्रो प्रयासमा, हामीले महत्त्वपूर्ण लगानी आवश्यक पर्ने धेरै मुख्य क्षेत्रहरू पहिचान गरेका छौं। यी क्षेत्रहरूमा भौतिक पूर्वाधार, ऊर्जा, पर्यटन, कृषि र उत्पादन समावेश छन्। साझा समृद्धिका लागि राष्ट्रको दिगो विकास लक्ष्यहरू हासिल गर्न हाम्रा प्रयासहरूसँग मिल्न हामीलाई निजी क्षेत्र र वित्तीय संस्थाहरूको समर्थन र साझेदारी चाहिन्छ। हामी नविन, दिगो समाधानहरूमार्फत नेपालको लगानीको खाडललाई पूरा गर्न खोजिरहेका छौं । सरकार विदेशी लगानी आकर्षित गर्न र नयाँअवसरहरू सिर्जना गर्न हाम्रा अन्तर्राष्ट्रिय साझेदारहरूसँग काम गर्न प्रतिबद्ध छ। हामी हाम्रो विकास प्रयासहरूमा वित्तीय संस्था र विकास साझेदारहरूसँग निजी क्षेत्रसँग प्रभावकारी साझेदारी गर्न उत्सुक छौं,’ उनले भने ।

प्रधानमन्त्री दाहालले नेपाल सरकारले विकासका लक्ष्य हात पार्नका लागि यसअघि नै लगानीका क्षेत्र तय गरेको र लगानीका लागि संस्थागत र संरचनागत व्यवस्था गरिरहेको बताए । उनले विश्वमा उदाउँदै गरेका नयाँ वित्तीय लगानीका अवधारणको खोजीमा सम्मेलन आयोजना हुनु निकै सान्दर्भिक भएको बताए ।

प्रकाशित : वैशाख २९, २०८० १४:१३
प्रतिक्रिया
पठाउनुहोस्

गुलरियामा रेबिजले एक महिनामा २ जनाको मृत्यु

कमल पन्थी

बर्दिया — सदरमुकाम गुलरियामा एक सातायता रेबिजग्रस्त कुकुरको टोकाइबाट गुलरिया–५ का सात वर्षीय बालकको मृत्यु भयो । यसैगरी कुकुरको टोकाइबाट तीन साताअघि गुलरिया–९ का २३ वर्षीय किशोरको मृत्यु भएको जिल्ला अस्पताल, बर्दियाले जनाएको छ ।

रेबिजग्रस्त कुकुरबाट दुई जनाको मृत्युपछि अस्पतालमा रेबिजविरुद्ध खोप लगाउनेको संख्या दैनिक तीन दर्जन बढी रहेको मेडिकल सुपरिन्टेन्डेन्ट डाक्टर सुभाष पाण्डेयले बताए । कुकुरको टोकाइबाट मृत्यु भएकाको सम्पर्कमा आएका मानिस भ्याक्सिन लगाउन अस्पताल आउने गरेको मेसु पाण्डेयले जनाए । कुकुरको टोकाइबाट खोप लगाइएका अधिकांश रेबिज हुन सक्ने आशंकामा आउने गरेको स्वास्थ्यकर्मी बताउँछन् । बहुला कुकुरबाट टोकेर यस आ/वमा थप ३ सहित पाँच जनाको मृत्यु भएको छ । गाउँघरमा उपचार गराएका कारण मृत्यु भएका तीन जनाको तथ्यांक जिल्ला अस्पतालसँग नभएको मेसु पाण्डेय बताउँछन् ।

रेबिजग्रस्त कुकुरको व्यवस्थापन नभएसम्म यसको समाधान नहुने स्थानीय बताउँछन् । सामुदायिक कुकुर सहरी र ग्रामिण क्षेत्र दुवैमा बढी भएको पाइएको छ । गुलरिया नगरपालिकाका स्वास्थ्य शाखा प्रमुख सुनिल पाण्डेले बहुला कुकुर व्यवस्थापन गर्न पशु कार्यालयसँग सम्पर्क गरेको बताए । 'बहुला लगायत, भुस्याहा कुकुर मार्दा उनीहरुको अधिकार हनन हुने भन्दै अधिकारीवादीको विरोध गर्छन्,' उनले भने, 'यसै कारण बहुला कुकुर मार्न सकिँदैन ।' गत साउनयता १ हजार ४ सय जनाले जिल्ला अस्पतालमा रेबिजको खोप लगाइसकेका छन् ।

माग अनुसार उपलब्ध नहुँदा खोप अभाव हुँदै गएको छ । निःशुल्क रुपमा यो खोप पाउने गरिन्छ । जिल्ला अस्पतालमा गत आवमा ३ सय भाइल खोप आउँथ्यो । अहिले घटेर २ सय भाइल आएको छ । जिल्लामा कति जनालाई रेबिजग्रस्त कुकुरले टोके भन्ने तथ्यांक भने छैन । पहिले यसका लागि कुकुरको पहिचान गर्न जरुरी रहेको स्वास्थ्यकर्मीले बताएका छन् ।

प्रकाशित : वैशाख २९, २०८० १४:०५
पूरा पढ्नुहोस्
प्रतिक्रिया
पठाउनुहोस्
×