निगमको दुबई-काठमाडौं उडान गर्ने महिला पाइलटलाई सम्मान
काठमाडौँ — राष्ट्रिय ध्वजावाहक नेपाल वायुसेवा निगमको महिला क्रुले दुबई-काठमाडौं उडान गर्ने महिला चालक दललाई सम्मान गरिएको छ ।
नेपाल नागरिक उड्डयन प्राधिकरणका महानिर्देशक प्रदीप अधिकारीले आइतबार बबरमहलस्थित मुख्यालयमा आयोजित कार्यक्रममा पाइलट भावना गिरी पन्त र को-पाइलट सिर्जना रावतलाई सम्मान गरेका हुन् ।
उनीहरुले अन्तर्राष्ट्रिय श्रमिक महिला दिवसका दिन निगमको उडान नम्बर आरए-२३० दुबई-काठमाडौं उडान सम्पूर्ण महिला चालकदलका सदस्यहरु (ककपिट क्रु र क्याबिन क्रु) को टिमले काठमाडौंमा अवतरण गराएका थिए ।
हाल निगममा कुल ९ जना महिला पाइलट रहेकामा १ जना ए-३३०, ४ जना ए-३२० र ४ जना आन्तरिक उडानका विमानमा कार्यरत रहेका छन् । यसैगरी निगममा कार्यरत १४५ क्याबिन क्रूमध्ये ९६ जना महिला रहेका छन् । हाल नेपालमा ५० हाराहारी महिलाले जहाज र हेलिकप्टर उडाउँदै आएका छन् । आन्तरिक उडानमा महिला चालक दलले नेतृत्व गरे पनि नेपालबाहिर नेपाली वायु सेवामा कार्यरत महिला पाइलटले त्यसअघि उडान भरेका थिएनन् ।
प्रकाशित : फाल्गुन २८, २०७९ २१:५२
