विश्व एथलेटिक्स च्याम्पियनसिप : १०० मिटरमा आयुषको ११.०७ सेकेन्ड

१०० मिटर दौडको प्रारम्भिक हिटमा उनले उक्त टाइमिङ निकालेका थिए । हिट नम्बर २ मा उनी चौथो स्थानमा रहे । उक्त हिटबाट मलेसियाका अजिम फामी (१०.२४) र बेलिजका ब्रेन्डन जोन्स (१०.९४) अर्को चरणलाई छनोट भए ।

प्रारम्भिक हिटमा दुरी पार गर्ने २६ प्रतिस्पर्धीबीच समग्रमा आयुष १५ औं स्थानमा रहन सफल भए । १०.९४ सेकेन्डअगाडि दुरी पार गर्ने १० खेलाडी भने अघिल्लो चरणका लागि छनोट भएका छन् ।

नेपालको राष्ट्रिय कीर्तिमानलाई तोड्ने लक्ष्यमा अगाडि बढिरहेका आयुषले गत महिना (जुलाई १३) को टाइमिङभन्दा सुधार गरेका छन् ।

‘विश्वका एकसेएक धावकको बीचमा प्रतिस्पर्धा गर्नु नै ठूलो अवसर थियो । मैले आफूले सक्दो राम्रै प्रदर्शन गरें, ११ सेकेन्डभन्दा अघि नै पूरा गर्छु भन्ने थियो, यसपालि सकिनँ,’ आयुषले कान्तिपुरसँग भने, ‘तर गुरुहरूले अहिलेको नेपालकै उत्कृष्ट टाइमिङ आएको छ, चिन्ता नलिनु भन्नुभएको छ । त्यसैले खुसी लागेको छ ।’

आफ्नो प्रदर्शनमा अझै धेरै सुधार गर्न बाँकी रहेको उनले बुझेका छन् । उनले भने, ‘अफ सिजनमा म आफू त्यसमै केन्द्रित हुन्छु । त्यहीअनुसार राष्ट्रिय प्रतियोगितालाई तयारी गर्छु,’ उनले भने ।

बैंककमा सम्पन्न एसियन एथलेटिक्स च्याम्पियनसिपमा उनले १०० मिटर दुरी ११.२० सेकेन्डमा पूरा गरेका थिए । एसियन च्याम्पियनसिप नेपालबाट प्रतिनिधित्व गरेको उनको पहिलो अन्तर्राष्ट्रिय सहभागिता थियो । जहाँ उनले २०० मिटर दौडमा पनि प्रतिस्पर्धा गरे ।

त्यसका लागि आयुष दशरथ रंगशालामै ट्रेनिङ गरेर बैंकक गएका हुन् । उनीसहित ६ नेपाली खेलाडीले बैंककमा प्रतिस्पर्धा गरेका थिए ।

१०० मिटर दौडमा नेपालको राष्ट्रिय कीर्तिमान १०.७१ सेकेन्डको छ । सन् १९९९ मा नेपालमै भएको आठौं दक्षिण एसियाली खेलकुदमा यो कीर्तिमान रामकृष्ण चौधरीले बनाएका थिए । जुन आजका दिनसम्म स्थापित छ ।

अमेरिकाको क्यालिफोर्नियामा अध्ययन गरिरहेका आयुष त्यतैबाट सिधै हंगेरी पुगेका हुन् । वाइल्ड कार्ड कोटामार्फत विश्व च्याम्पियनसिप खेलेका उनले हंगेरी जानुअघि भनेका थिए, ‘विश्व च्याम्पियनसिपमा मेरो पहिलो लक्ष्य त वर्षौंदेखि स्थापित राष्ट्रिय कीर्तिमान तोड्नु हुनेछ । त्यसपछि अरू कुरा सोच्ने छु ।’ स्पोर्टिङ नेसन्सको रूपमा नेपाल धेरै पछाडि रहेकाले त्यसबाट देशलाई चिनाउने आफ्नो धोको रहेको उनले सुनाएका थिए ।

आयुषले नवौं राष्ट्रिय खेलकुदमा पनि १०० मिटर दौडमा प्रतिस्पर्धा गरेका थिए । उनी चौथो स्थानमा रहे । जहाँ एपीएफका शिवराज पार्कीले स्वर्ण जितेका थिए । एसियन च्याम्पियनसिपमा भने शिवराज (११.२२ सेकेन्ड) लाई आयुषले उछिनेका थिए ।

२८ वर्षीय धावक आयुषको १०० मिटरको व्यक्तिगत उच्च प्रदर्शन भने ११.०१ सेकेन्डको हो । उनले यो टाइमिङ गत मार्च १८ मा क्यालिफोर्नियामै भएको ट्र्याक एन्ड फिल्डमा निकालेका थिए । उनले क्यालिफोर्नियामा अध्ययनसँगै रनिङ करिअर अगाडि बढाइरहेका छन् ।

अमेरिकामा भएको अघिल्लो संस्करणको विश्व एथलेटिक्स च्याम्पियनसिपमा नेपालबाट म्याराथन धावक कृष्णबहादुर बस्नेतले भाग लिएका थिए ।