मोटरसाइल चोरी आरोपमा ८ पक्राउ

एक वर्षदेखि उर्लाबारी, पथरी, बेलबारी, मधुमल्ला, झापाको दमकलगायत क्षेत्रमा मोटरसाइकल चोरी गर्ने समूह सक्रिय थियो । प्रहरी निरीक्षक राजकुमार राईका अनुसार पक्राउ पर्नेमा मोरङ मधुमल्ला–५ का शुक्र लिम्बू, उर्लाबारी १ का राजकुमार राई र शम्भु राई तथा उर्लाबारी–२ का सुजित राई छन् ।
उनीहरूले रातको समयमा तथा घरमा कोही नभएको मौका छोपी लक लगाएर राखेका मोटरसाइक चोरी गर्ने गरेका थिए । चोरी गरिएका मोटरसाइकल इलामको चुलाचुली र कमलझोडा क्षेत्रमा लगेर २० देखि २५ हजार रुपैयाँसम्ममा बेच्ने गरेका थिए । चोरीका मोटरसाइकल किनबेच गर्ने काममा संलग्न आरोपमा प्रहरीले मधुमल्ला–७ का इन्द्र भनिने योगेन्द्र विश्वकर्मा र रोशन कार्की तथा इलाम चुलाचुली–१ का कुमार लाबुङ र अटल नेम्बाङलाई समेत पक्राउ गरेको छ ।
यसैगरी लमजुङमा विभिन्न आपराधिक क्रियाकलापमा संलग्न रहेको आरोपमा प्रहरीले ५ जनालाई पक्राउ गरेको छ । ज्यान मार्ने उद्योगअन्तर्गत २, चोरीमा २ र लागूऔषध ओसारपसारमा १ जनालाई मुद्दा चलाएको छ ।
प्रहरीका अनुसार चिती–७ घर भई हाल बेसीशहरमा डेरा गरि बस्ने २५ बर्षीय सन्तोष परियार र उनका भाई १९ बर्षीय राजु परियारलाई ज्यान मार्ने उद्योगअन्तर्गत मुद्दा चलाएको हो । दाजुभाइले मंसिर २४ मा सिम्पानी–५ घर भई बेसीशहरमा मजुदुरी गर्दै आएका २२ बर्षीय राजेन्द्र थापालाई ढुंगाले हानेर गम्भीर घाइते बनाएको प्रहरीले जनाएको छ । ती दुईलाई थप अनुसन्धानका लागि मंगलबार अदालतबाट ८ दिनको म्याद थप भएको प्रहरी निरीक्षक कमलबहादुर रजौरेले बताए । घाइते थापाको अवस्था गम्भीर अवस्थामा मणिपाल शिक्षण अस्पताल पोखरामा उपचार भइरहेको प्रहरीले जनाएको छ ।