सुवेदीको मुद्दामा कारण माग
काठमाडौं — किर्ते गरेर उमेर बढाएको विवादमा परेका वैदेशिक रोजगार विभागका महानिर्देशक सहसचिव भरतराज सुवेदीलाई असोज १५ देखि लागू हुने गरी अवकाश दिइनुको लिखित
कारण दुई दिनभित्र पेस गर्न सर्वाेच्च अदातलले सरकारका नाममा आदेश जारी गरेको छ ।
प्रधानन्यायाधीश कल्याण श्रेष्ठको एकल इजलासले सोमबार जारी गरेको आदेशमा सरकारको लिखित जवाफ आएपछि १३ गते अन्तरिम आदेश दिने/नदिनेबारे छलफलका लागि मुद्दा पेसीमा तोक्न भनिएको छ । निजामती ऐनअनुसार ५८ वर्षमा अनिवार्य अवकाश पाउने उमेर हदका कारण शुक्रबार सेवाबाट बाहिरिँदै गरेका सुवेदीले ३ वर्ष उमेर बढाएको प्रमाणित भएको थियो । सुवेदीले मोरङबाट २०३१ मा लिएको नागरिकतामा जन्ममिति २०१४ असोज १५ उल्लेख छ । तर उनले कानुन किताबखानामा सच्याएर २०१७ असोज १५ बनाएका थिए ।
