बुटवल — देशभरका उपमहानगरपालिकाहरुको पहिलो राष्ट्रिय सम्मेलन बुटवलमा सुरू भएको छ । बुटवलको अन्तर्राष्ट्रिय सम्मेलन केन्द्रमा लुम्बिनी प्रदेशका प्रदेश प्रमुख अमिक शेरचनले सम्मेलनको उद्घाटन गरे ।

सम्मेलनमा देशभरका उपमहानगरपालिकाहरुका प्रमुख, उपप्रमुख र प्रमुख प्रशासकीय अधिकृतहरुसहित करिब ५ सय जना सहभागी छन् । उपमहानगरका समान समस्या, समान मुद्दा र समान संरचना बीचमा अनुभव आदान प्रदान गर्ने, साझा समस्याको समाधानमा एकीकृत पहल गर्ने, साझा र एकल अधिकार प्रयोगमा एकरुपता ल्याउने उद्देश्यले राष्ट्रिय सम्मेलन आयोजना गरिएको हो ।

सम्मेलनमा संविधानअनुसार साझा र एकल अधिकारको प्रयोगका चुनौती, असल अभ्यासबारे अनुभव आदानप्रदान, संघ र प्रदेश सरकारसँग स्थानीय सरकारका रुपमा अपेक्षा र स्थानीय आवश्यकताजस्ता विषयमा छलफल गरी निष्कर्ष निकालिने छ । यस्तै, उपमहानगरका साझा समस्या समाधानका लागि सम्बन्धित निकायसँग सामूहिक रुपमा छलफलमा जाने निर्णय गरिने छ । सम्मेलनले साझा प्रतिबद्धतासहितको बुटवल घोषणापत्र जारी गर्ने आयोजक बुटवल उपमहानगरपालिकाका प्रमुख खेलराज पाण्डेयले बताए ।

सम्मेलनमा भाग लिन शुक्रबार नै उपमहानगरपालिकाका प्रतिनिधिहरु बुटवल आएका थिए । शुक्रबार साँझ उपमहानगरका असुल अभ्यासबारे छलफल गरिएको थियो ।