पाल्पाका प्रहरीलाई बाल संरक्षण कानुनमा अभिमुखीकरण

प्रहरीलाई संविधानमा उल्लेखित मौलिक हकमध्ये बालअधिकारका विषयमा कानुनी जानकारी दिइएको आयोजकले जनाए । संविधानको धारा ३९ मा बालअधिकारको मौलिक हकलाई समेटेको छ । बालअधिकारको सम्मान, संरक्षण, प्रवर्द्धन र परिपूर्ति गरी बालबालिकाको सर्वोत्तम हित कायम गर्नु परिवार, समाज र राज्यको दायित्वका विषयमा प्रशिक्षण दिइएको आयोजक संस्था महिला कानुन र विकास मञ्च काठमाडौंका कानुन अधिकृत विनोदचन्द्र देवकोटाले बताए ।

बालबालिकाविरुद्ध हुने भेदभाव, सबै प्रकारका दुर्व्यवहार, उपेक्षा, शोषण र हिंसाबाट जोगाउनेलगायत विषयमा जानकारी गराइएको संस्थाका कार्यकारी निर्देशक सविन श्रेष्ठले जानकारी दिए । अन्तर्राष्ट्रिय तथा नेपालका कानुनहरूले बालबालिकालाई जोखिमपूर्ण श्रम, बालविवाह, घरेलु हिंसा, यौन शोषण तथा बेचबिखन ओसारपसारजस्ता हिंसा र दुर्व्यवहारबाट संरक्षणको अधिकारको व्यवस्थाका विषयमा समेत जानकारी गराइएको जिल्ला प्रहरी कार्यालयका प्रहरी उपरीक्षक जनकबहादुर शाहीले बताए ।

बालबालिकाविरुद्ध हुने हिंसासम्बन्धी राष्ट्रिय तथा अन्तर्राष्ट्रिय कानुनी व्यवस्थाका विषयमा अधिवक्ता दीपेश श्रेष्ठ, बालबालिकाविरुद्ध हुने हिंसामा अनुसन्धान र यस क्रममा प्रहरीले ध्यान दिनुपर्ने पक्षहरूका विषयमा पाल्पाका प्रहरी नायव उपरीक्षक वीरेन्द्र थापा, बालबालिकाविरुद्ध हुने हिंसामा अनुसन्धानको क्रममा पीडितको अधिकारका विषयका संस्थाका कार्यकारी निर्देशक सविन श्रेष्ठले सहजीकरण गरे । आयोजक संस्थाका अनुसार कैलाली, कञ्चनपुर, रुपन्देहीमा पनि प्रहरीलाई अभिमुखीकरण गरिएको छ ।