नगर प्रमुखकै निर्देशनमा अवैध उत्खनन
महोत्तरी — महोत्तरीको गौशालास्थित मराहा खोलाबाट गिट्टी, बालुवाको अवैध उत्खनन गर्ने ६ वटा सरकारी गाडी नियन्त्रणमा लिइएको छ । अनुगमनका क्रममा नदीजन्य पदार्थको अवैध उत्खनन गरेको फेला परेपछि गौशाला नगरपालिकाका गाडी गिट्टी, बालुवासहित नियन्त्रणमा लिइएको हो ।
पालिकाको नाममा रहेका प्रदेश २–०४–००१ ग ०००१ नम्बरको एक्स्काभेटर र ढुवानीमा प्रयोग भइरहेका अन्य ५ वटा ट्र्याक्टर प्रहरीले नियन्त्रणमा लिई कारबाहीका लागि जिल्ला समन्वय समितिमा पठाएको हो ।
अनुगमनका क्रममा पालिकाकै नाममा रहेका एक्स्काभेटर र ट्र्याक्टर नै अवैध उत्खननमा प्रयोग भएको पाइएपछि प्रहरीले नियन्त्रणमा लिएको जिसस प्रमुख सुमनलाल कर्णले बताए । ‘नगरपालिकाले खोलाबाट ढुंगा, गिट्टी, बालुवा निकाल्न ठेक्का लगाउनै बाँकी छ । तर, यहाँ अन्य सरकोरवाला निकायलाई जानकारी नै नदिई नगर प्रमुखको ठाडो आदेशमा खोला उत्खनन गरिएको भेटिएपछि सवारीसाधन नियन्त्रणमा लिइएको हो,’ उनले भने, ‘नियमन गर्ने निकाय नै अवैध उत्खननमा सहभागी हुनु पक्कै राम्रो होइन ।’
पालिकाका बाहेक अवैध उत्खननमा प्रयोग गरिएका ना७ख ४१३२ नम्बरको टिपर, ना६त १६९१, ज१त ६५२३ र ज१त ३७३ नम्बरको ट्र्याक्टर पनि नियन्त्रणमा लिएको इलाका प्रहरी कार्यालय गौशालाका प्रहरी निरीक्षक रञ्जन मिश्रले बताए । प्रहरीले नियन्त्रणमा लिएका गाडी तथा उपकरण पालिकाले जरिवाना लिएर छोड्ने गरेको छ तर यहाँ पालिकाकै सवारीसाधन नै अवैध उत्खननमा प्रयोग भइरहेको भेटिएपछि नियन्त्रणमा लिई जिससलाई बुझाइएको उनले जानकारी दिए ।
उखु क्रसिङ गर्ने समय भएकाले भित्री बाटाहरू मर्मतका लागि आवश्यक नदीजन्य पदार्थ निकालेको गौशाला नगर प्रमुख दिपेन्द्र महतोले बताए । ‘पालिका नै अवैध उत्खननमा सहभागी भएको होइन । गौशाला–९ स्थित बाटोमा खाल्डाखुल्डी धेरै भएर उखु ढुवानी गर्न समस्या भइरहेको किसानको गुनासो सम्बोधन गर्न ग्राभेल निकालिएको हो,’ उनले भने, ‘पालिकाको आदेशमा नगरकै विकासमा लगाइएका सवारीसाधन हामीलाई जानकारी नै नदिई प्रहरीले नियन्त्रणमा लिनु उचित भएन ।’
यता, जिससले जिल्लाका सबै पालिका र क्रसर उद्योगलाई नदीजन्य पदार्थको मौज्दात रहेको विवरण र उद्योगको बैधताबारे कागजात पठाउन पत्राचार गरेको छ । तत्कालाई जिल्लामा कहींकतै उत्खनन नगर्न पनि स्पष्ट भनिएको जिसस प्रमुख कर्णले बताए । जिल्लाको गौशाला, भंगाहा र बर्दिवासमा अनुगमन गर्दा उत्खननलाई नियमसंगत र मापदण्डमा ल्याउन चुनौती देखिएको पनि उनले अनुभव सुनाए । ‘नियमन गर्ने निकाय नै उत्खननमा संलग्न हुने र तस्करकै संरक्षणमा लागेको आभास पाइएको छ, त्यसलाई नियन्त्रण गर्न जिसस लाग्नेछ,’ उनले भने ।
हाल नगरपालिकाकै सवारीसाधन नियन्त्रणमा लिइएकाले अन्य सवारीको हकमाभन्दा धेरै कारबाही गर्नुपर्ने देखिएको उनको भनाइ छ । यता, गौशाला नगरपालिकाले भने समुदायको काम गर्ने क्रममा खटाइएका सवारीसाधन किन र कति कारणले नियन्त्रणमा लिएको भनी प्रहरीलाई स्पष्टीकरण सोधेको नगर प्रमुख महतोले बताए । ती सवारीसाधन बिनासर्त प्रहरीले छाड्नुपर्ने उनको माग छ ।
प्रकाशित : पुस २३, २०७९ ०८:५९
