भारत आएका सांसदहरूको दाबी- ‘हामी विधिसम्मत नै आएका हौं’

पूर्वमन्त्रीसमेत रहेका एकीकृत समाजवादी पार्टीका सांसद शेरबहादुर कुँवरले आयोजक संस्थाले परराष्ट्र मन्त्रालयलाई आफूहरूको भ्रमणका बारेमा चिठी लेखेको तथा आफूहरूले संसदीय दल र संसद् सचिवालयलाई जानकारी दिएरै भारत आएको दाबी गरे ।

उनले देश–विदेशका भ्रमणहरू सबै सरकारी तहबाट मात्रै नहुने भन्दै विगतमा पनि गैरसरकारी संस्थाहरूले अध्ययन भ्रमण गराउँदै आएको भन्दै यसको नकारात्मक प्रचार सही नभएको बताए । अयोजक संस्थाले परराष्ट्र मन्त्रालयलाई चिठी लेखेपछि मन्त्रालयमार्फत दूतावासलाई जानकारी आउनुपर्ने उनको भनाइ थियो ।

उनले भ्रमणका क्रममा भएका भेटघाट र अन्तर्क्रियाहरू उपयोगी र महत्त्वपूर्ण भएको बताए । माओवादीका सांसद माधव सापकोटाले संसद् सचिवालयमा जानकारी तथा आ–आफ्ना दलबाट भ्रमण स्वीकृत गराएरै आएको बताए । दिल्ली बसाइको तीन दिनमा ९ स्थानमा भेटघाट र अन्तर्क्रिया भएको उनले जानकारी दिए । सबै कार्यक्रममा भारतीय विदेश मन्त्रालयका अधिकारीको उपस्थिति रहेको उनको भनाइ छ । ‘समग्रतामा संसदीय अभ्यासको अवलोकन भ्रमण सकारात्मक र ज्ञानवर्द्धक भएको छ,’ उनले भने, ‘नेपाल फर्केर यसलाई औपचारिक रुपमा लिपिबद्ध गरेर डकुमेन्ट बनाएरै संसद् सचिवालय र सरकारलाई बुझाउँछौं ।’

राजदूत शंकरप्रसाद शर्मासँगको अन्तर्क्रियामा भ्रमणका क्रममा भएका भेटघाट र अन्तर्क्रियाहरू उपलब्धीमूलक रहेको सबैजसो सांसदले बताएका थिए । राजदूत शर्माले दुई देशबीच रहेका मुद्दाहरूबारे सांसदहरूलाई अवगत गराएका थिए । उनले परराष्ट्र मन्त्रालय, संसद् सचिवालय वा भ्रमण आयोजक संस्था कतैबाट पनि दूतावासलाई सांसदहरूको भ्रमणबारे जानकारी नआउँदा भ्रमण तयारी वा समन्वयमा सन्दर्भमा दूतावास सक्रिय हुन नसकेको उल्लेख गरेका थिए ।

एउटा एनजीओले समन्वय गरेर प्रतिनिधिसभाका १२ जना सदस्य मंगलबार दिल्ली आएका हुन् । स्वतन्त्र युवा प्रजातान्त्रिक संघ, नेपाल नामको संस्थाले समन्वय गरेर सांसदहरूलाई दिल्ली ल्याएको हो । एकै साथ ठूलो संख्यामा सांसदहरू ९ दिनको भारत भ्रमणमा आएका हुन् । संसद चलिहरेका बेला विभिन्न पार्टीका सांसदहरू संसद् सचिवालयलाई जानकारी नगराइकनै भ्रमण आएको र त्यसको जानकारी दिल्लीस्थित नेपाली दूतावासलाई समेत नरहेको कुरा बाहिरिएपछि सांसदहरूको भ्रमण विवादित बन्न पुगेको छ ।

नेपाली कांग्रेसबाट प्रतिनिधिसभा सदस्यमा मैना कार्की, प्रतिमा गौतम, शान्ति विक र सीता मिजार छन् । एमालेका मेनुका पोखरले, बलराम अधिकारी, नारयाण आचार्य, सराज अहमद फारुक छन् । त्यस्तै, माओवादी केन्द्रका माधव सापकोटा, मिना तामाङ छन् । राष्ट्रिय स्वतन्त्र पार्टीका ढककुमार श्रेष्ठ र नेकपा समाजवादीका शेरबहादुर कुँवर भ्रमण टोलीमा सहभागी छन् ।

सांसदहरूले भारतको लोकसभामा भारतको संसदीय व्यवस्था प्रणालीकका सम्बन्धमा छलफल भएको बताएका छन् । त्यसबाहेकको विभिन्न छलफल र अन्तरर्क्रियाहरू पनि दुई देशको सम्बन्धका लागि उपयोगी रहेको बताएका हुन् । एमालेका सांसद बलराम अधिकारीले आफूहरूको भ्रमणबारे केही अस्पष्टता देखिए पनि पार्टीगत रुपमा आधिकारीक जानकारी र बिदा लिएरै आएको बताए । उनले भारतले गरेको विकास र भारतले नेपाललाई कसरी हेर्दै छ भन्नेजस्ता विषयमा भारतीय संसद् र नीति आयोग, उद्योग व्यापारी, ऊर्जा उत्पादनमा जोडिएका संस्थाहरूसँग छलफल गरिएको बताए ।