नेपाल लाइफ इन्स्योरेन्सको नाफामा २३७ प्रतिशतको वृद्धि
काठमाडौँ — नेपाल लाइफ इन्स्योरेन्स कम्पनीले चालु आर्थिक वर्षको दोस्रो त्रैमासमा उल्लेख्य प्रगति गरेको छ । कम्पनीले सार्वजनिक गरेको दोस्रो त्रैमाससम्मको अपरिस्कृत वित्तीय विवरण अनुसार खुद नाफामा २३७ प्रतिशत वृद्धि भएको छ ।
गत आर्थिक वर्षको दोस्रो त्रैमासमा कम्पनीले १३ करोड ४ लाख ९९ हजार रुपैयाँ खुद नाफा आर्जन गरेकोमा चालु आर्थिक वर्षको सोही अवधिमा कम्पनीले ४४ करोड १ लाख ६० हजार रुपैयाँ आर्जन गरेको छ । पुस मसान्तसम्म कम्पनीले १८ अर्ब ६२ करोड ७४ हजार रुपैयाँ कुल बीमा शुल्क आर्जन गरेको छ भने ८ अर्ब ४४ करोड २५ लाख रुपैयाँ खुद दाबी भुक्तानी गरेको छ ।
समीक्षा अवधिमा कम्पनीको खुद दाबी भुक्तानी १६ प्रतिशतले बढेको छ । पुस मसान्तसम्म कम्पनीको लगानी २०.४६ प्रतिशत बढेर १ खर्ब ५६ करोड ४५ लाख ३२ हजार रुपैयाँ पुगेको छ । कम्पनीको चुक्ता पुँजी ८ अर्ब २० करोड रुपैयाँ, जीवन बीमा कोष १ खर्ब ५० अर्ब ८५ करोड रुपैयाँ र महाविपत्ति कोष ८३ करोड ३६ लाख रुपैयाँ पुगेको छ ।
