‘एमालेले मलाई समर्थन गर्दा राष्ट्रिय सहमति बन्छ’

राष्ट्रपति निर्वाचनलगायत विषयमा रहेर कान्तिपुरकर्मी कुलचन्द्र न्यौपानेले पौडेलसँग गरेको कुराकानीको अंश-

कांग्रेस, माओवादीसहित आठ दलबाट राष्ट्रपतिमा उम्मेदवारी दिँदा कस्तो अनुभव भएको छ ?

आठ दलमा संविधान र परिवर्तनका उपलब्धिलाई जोगाउने चिन्ता छ । यसैका लागि एक ठाउँमा मिल्नुपर्छ भनेर शुक्रबारबाट नयाँ राजनीतिक बाटो निर्माण भएको छ । हामी सबैलाई विगतमा दुई–दुई पटक भएको संसद् विघटनको घटनाले चस्का पसेको छ । अब फेरि त्यस्तै घटना नहोस् र संसद्को स्थायित्व कायम होस् भन्ने सोचेरै एक ठाउँमा उभिएका हौं । राजनीतिलाई अब विघटन र अस्थिरताको दिशामा लैजान हुन्न । पाँच वर्षसम्मै संसद्को स्थायित्व सुनिश्चित गरेर अघि बढ्नुपर्छ ।

तपाईंलाई जिम्मेवारी र दायित्वको भारीले थिचेजस्तो लागेको छ कि छैन ?

म फिल्ड वर्कर हो । फिल्डमा गएर राजनीति गर्न रुचाउँछु । लामो समय सक्रिय राजनीतिबाट आएकाको स्वभाव र आनीबानीले भलाद्मी भएर बस्न सुरुमा अलिअलि समस्या पर्ला तर लामो ज्ञान र अनुभवले पनि अब आउने जिम्मेवारी बहन गर्न सक्छु भन्नेमै छु ।

तपाईंले राष्ट्रिय सहमतिका लागि पहल गर्छु भन्नुभएको छ, यो कति सम्भव छ ?

हामीले लामो संघर्ष, दुःख, कष्ट, बलिदान र योगदान गरेर व्यवस्थाको टुंगो लगाएका हौं । देशमा संघीय लोकतान्त्रिक गणतन्त्र र समावेशी लोकतन्त्रले गर्दा तल्लो तहमा थिचिएर, पिल्सिएर रहेका जनजाति, मधेसी, दलित, महिला, थारू, मुस्लिमलगायत सबैले राजनीतिक र समानुपातिक समावेशिताको अधिकार पाएका छन् । ठूलो उपलब्धि बोकेको संविधानमाथि प्रहार गर्न थालिएको छ । अहिले संविधानलाई जोगाएर सँगै अघि बढ्नुपर्ने दायित्व छ । हामी सबैमा देशभक्तिको भावना छ भने मिलेर अघि बढ्नुपर्छ भनेरै राष्ट्रिय सहमतिका लागि पहल गर्न खोजेका हौं ।

एमालेसँग राजनीतिक दूरी बढेको छ । उसले राष्ट्रपतिमा सुवास नेम्वाङलाई अघि सारेको छ । यस्तो अवस्थामा सहमति सम्भव छ ?

लामो राजनीतिक संघर्षबाट आएको र समकालीन नेताहरूमा सबैभन्दा सिनियर मै छु । त्यसकारण एमालेलाई मेरो पक्षमा सहमति गर्न सहज हुन्छ । अहिलेको मुख्य दायित्व भनेकै संविधानको संरक्षण र परिवर्तनको रक्षा गर्नु हो । म यसको असली संरक्षक हुनेछु । सबै राजनीतिक दलको संरक्षक र अभिभावक हुनेछु ।

तपाईं एमालेसँग पनि सहमतिका लागि पहल गर्दै हुनुहुन्छ ?

हो, एमालेका नेताहरूसँग पनि सहमति गरौं भनिरहेको छु । राष्ट्रिय स्वतन्त्र पार्टी र अरू दलसँग पनि पहल गरिरहेको छु । मैले सुरुदेखि भन्दै आएको हुँ, पछि प्रधानमन्त्रीजीले सहमतिका लागि पहलकदमी लिनुभयो । उम्मेदवारी दिने बेलासम्म सहमति हुन सकेन तर अझै समय छ । संसद्को ठूलो दल भएकाले कांग्रेसलाई राष्ट्रपति दिनु जनमतको सम्मान हुन्छ । एमालेले सभामुख पाइसकेको छ, यसैमा चित्त बुझाउन सके सहमतिको सम्भावना बढ्छ ।

उम्मेदवार बन्नुअघि तपाईंलाई एमाले नेताहरूबाट पनि सहमतिका लागि पहल गर्नुहोस् भन्ने सुझाव आएको साँचो हो ?

कांग्रेसलाई र व्यक्तिगत रूपमा मलाई भनिएको छैन । उहाँहरूले हामी उम्मेदवार दिन्छौं, त्यसैमा सहमति गरौं भन्नुभएको हो । त्यो पनि हामीसँग होइन, सत्ता गठबन्धनमा रहेका दलसँग भन्नुभएको हो । उम्मेदवार चयन गर्ने बखतमै एमाले मानिदिएको भए मुलुकमा राम्रो सन्देश जान्थ्यो ।

सहमति हुने कत्तिको विश्वास छ ?

राजनीति हो, अहिल्यै केही भन्न सकिने स्थिति छैन ।