बक्रकुण्ड गोल्ड कप फुटबलको उपाधि सुनसरीलाई

निर्धारीत समयमा दुवै तर्फबाट दुई दुई गोल भएपछि खेल पेनाल्टी सुट आउटमा धकेलिएको थियो । पेनाल्टी सुट आउटमा ५–४ गोल अन्तरले सुनसरीले इलामलाई पराजित गर्‍यो । पेनाल्टीका क्रममा इलामका एक खेलाडीको प्रहार गोल पोष्टबाट बाहिरिएपछि इलाम पराजित हुन पुग्यो ।

प्रतियोगिताको बिजेता टिम सुनसरीले उपाधि सहित नगद एक लाख रुपैयाँ हात पारेको छ । उपविजेता इलामले नगद ५० हजार रुपैयाँमा चित्त बुझाएको छ । प्रतियोगिता हिलेस्थित धार्मिक पर्यटकीयस्थल बक्रकुण्ड धामको नाममा तीन बर्ष अघिदेखि सञ्चालन भएको आयोजकले जनायो ।

हिले फुटबल क्लबको आयोजनामा प्रतियोगिता सञ्चालन हुँदै आएको छ । गत २३ गतेबाट सञ्चालन भएको प्रतियोगितामा धनकुटासहित कोशी प्रदेशको मोरङ, सुनसरी, झापा, इलाम, संखुवासभा, तेह्रथुम र मधेश प्रदेशको सप्तरी जिल्लाको सहभागिता रहेको आयोजक समितिका सचिव अर्जुन शाहीले जानकारी दिए ।