१७ औं एनएनआईपीए अवार्डको तयारी पूरा : महासचिव गोथे
काठमाडौँ — १७ औं संस्करणको एनएनआईपीए स्पोर्ट्स अवार्डको सम्पूर्ण तयारी पूरा भएको आयोजक नेपाल राष्ट्रिय तथा अन्तर्राष्ट्रिय खेलाडी संघले जनाएको छ ।
चैत २० गते सोमबार राजधानीमा हुने अवार्डको सम्पूर्ण तयारी पूरा भएको संघका महासचिव शिवसुन्दर गोथेले शनिबार पत्रकार सम्मेलनमा बताए ।
विगत वर्षमा उपत्यकाका विभिन्न ऐतिहासिक तथा सांस्कृतिक स्थलमा गरिँदै आएको अवार्ड यसपालि आफ्नै स्रोतबाट होटलमा गरिन लागेको महासचिव गोथेले बताए ।
यस अवार्डमा नेपाल ओलम्पिक कमिटीबाट आधिकारिकता प्राप्त २७ खेलका उत्कृष्ट वर्ष खेलाडीसहित पाका खेलव्यक्तित्व, वर्षका पारा खेलाडी, प्रतिभाशाली खेलाडीलाई सम्मान गरिनेछ । २७ खेलका उत्कृष्टले जनही १० हजार पाउनेछन् । त्यसमध्येबाट सर्वोत्कृष्ट महिला र पुरुष खेलाडीले जनही एक लाख, प्रतिभाशाली महिला र पुरुष खेलाडीले जनही ५० हजार, पाका खेलव्यक्तित्वलाई गजराज आर्दश खेल व्यक्तित्वलाई ३५ हजार, वर्ष पारा खेलाडीलाई १५ हजारबाट सम्मानित गरिनेछ । त्यस्तै एक खेलपत्रकार एनएनआईपीए खेल पत्रकारिता पुरस्कार प्रदान गरिनेछ ।
यसपालि फुटबल, एथलेटिक्स, ह्यान्डबल, गल्फ, उसु, भारोत्तोलन, सुटिङ, जुडो, ब्याडमिन्टन, आर्चरी, टेबलटेनिस, बक्सिङ, साइक्लिङ, फेन्सिङ, जिम्न्यास्टिक, हक्की, पौडी, ट्रायथोलन, स्की, कुस्ती, बास्केटबल, कबड्डी, कराते, र्याफ्टिङ, भलिबल, तेक्वान्दो र लन टेनिसका खेलाडी सम्मानित हुनेछन् । विगतमा कार्यक्रमअगाडि नै हरेक खेलको वर्ष खेलाडी छान्ने गरिए पनि यसपालि कार्यक्रमकै दिन उत्कृष्ट वर्ष खेलाडीको घोषणा गरिने संघका उपमहासचिव मन्डेकाजी श्रेष्ठले बताए । सम्बन्धित खेल संघको सिफारिसमा वर्षको उत्कृष्ट खेलाडी छान्ने गरिएको उनले जनाए ।
