साफ च्याम्पियनसिप सेमिफाइनल आज- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

साफ च्याम्पियनसिप सेमिफाइनल आज

कान्तिपुर संवाददाता

काठमाडौं — डिफेन्डिङ च्याम्पियन अफगानिस्तानले साफ च्याम्पियनसिप २०१५ को सेमिफाइनलमा बिहीबार श्रीलंकासँग खेल्दैछ । भारतविरुद्ध माल्दिभ्सको अर्को सेमिफाइनल पनि बिहीबारै हुनेछ ।

अफगानिस्तानले एसियाली फुटबल महासंघ (एएफसी) को सदस्यता दक्षिणबाट मध्यक्षेत्रमा सारिसकेको छ । त्यसमा उसले अब एसियाली महारथी इरान, उज्वेकिस्तान, किर्गिस्तान, ताजकिस्तान, तुर्कमेनिस्तानसँगै खेल्नेछ । त्यसैले अफगानिस्तानले अहिलेको साफलाई दक्षिण एसियाली फुटबलमा आफ्नो अन्तिम प्रतियोगिता भएको बताएको छ ।

दशरथ रंगशालामा दुई वर्षअघि भएको साफको फाइनलमा भारतलाई २–० ले हराएर अफगानिस्तानले पहिलो अन्तर्राष्ट्रिय उपाधि जितेको थियो । अहिले त्रिवेन्द्रम (केरला) स्थित ग्रिनफिल्ड स्टेडियममा पनि उसले प्रभावशाली प्रदर्शन गरिरहेको छ ।

समूह ‘बी’ विजेता बन्ने क्रममा उसले बंगलादेशलाई ४–०, भुटानलाई ३–० र माल्दिभ्सलाई ४–१ ले हराएर शतप्रतिशत जित निकालेको थियो ।

प्रकाशित : पुस १६, २०७२ ०९:४०
प्रतिक्रिया
पठाउनुहोस्

सिजीलाई छावा फुटबलको उपाधि

विमल खतिवडा

सौराहा — १२ औं चितवन हात्ती महोत्सवमा आयोजित छावा फुटबलको उपाधि सिजी फुड्सले जितेको छ । बाघमारा मध्यवर्ती वनको चौरमा बुधबार भएको प्रतिस्पर्धात्मक फाइनल खेलमा नबिल बैंकलाई पराजित गर्दै सिजीले उपाधिमाथि कब्जा जमाएको हो ।

सिजीले नबिललाई २–० ले पराजित गर्‍यो । सिजीका तर्फबाट सौराहा गजले खेल सुरु भएको ४८ सेकेन्डमा गोल गर्दै टिमलाई बलियो बनायो । दर्शक भरिभराउ थिए ।

स्वदेशी तथा विदेशी दर्शक छावा फुटबलमा रमाए । नबिल बैंकबाट खेलेको चुरिया गजले आत्मघाती गोल गर्दा भने केही समय दर्शक स्तब्ध बने । दर्शक फरक/फरक टिमका समर्थक बनेर खेल हेर्न व्यस्त देखिन्थे ।

अघिपछि ३० मिनेट खेलाइने गरिएको भए पनि बुधबार दर्शकको चाप बढेसँगै आयोजकले ४० मिनेट समय निर्धारण गरी फुटबल खेलाएका थिए । दुवै टिमबाट हात्ती प्रजनन केन्द्रका ४/४ वटा छावा हात्ती सहभागी थिए ।

 छावा हात्तीले घम्साघम्सी गर्दै बल प्रहार गर्दा दर्शक एकोहोरो ताली बजाउँदै रमाइरहे । फुटबल हेर्न विभिन्न जिल्लादेखि कार्यालय प्रमुखसमेत उपस्थित थिए । फुटबल मैदान दर्शकले घेरिएको थियो । त्यस्तै टिकटको व्यवस्था गरिएको प्यारापिटमा समेत दर्शक भरिभराउ थिए । छावा फुटबलमा ४ टिम सहभागी थिए ।

प्रकाशित : पुस १६, २०७२ ०९:३९
पूरा पढ्नुहोस्
प्रतिक्रिया
पठाउनुहोस्
×