सिजीलाई छावा फुटबलको उपाधि
सौराहा — १२ औं चितवन हात्ती महोत्सवमा आयोजित छावा फुटबलको उपाधि सिजी फुड्सले जितेको छ । बाघमारा मध्यवर्ती वनको चौरमा बुधबार भएको प्रतिस्पर्धात्मक फाइनल खेलमा नबिल बैंकलाई पराजित गर्दै सिजीले उपाधिमाथि कब्जा जमाएको हो ।
सिजीले नबिललाई २–० ले पराजित गर्यो । सिजीका तर्फबाट सौराहा गजले खेल सुरु भएको ४८ सेकेन्डमा गोल गर्दै टिमलाई बलियो बनायो । दर्शक भरिभराउ थिए ।
स्वदेशी तथा विदेशी दर्शक छावा फुटबलमा रमाए । नबिल बैंकबाट खेलेको चुरिया गजले आत्मघाती गोल गर्दा भने केही समय दर्शक स्तब्ध बने । दर्शक फरक/फरक टिमका समर्थक बनेर खेल हेर्न व्यस्त देखिन्थे ।
अघिपछि ३० मिनेट खेलाइने गरिएको भए पनि बुधबार दर्शकको चाप बढेसँगै आयोजकले ४० मिनेट समय निर्धारण गरी फुटबल खेलाएका थिए । दुवै टिमबाट हात्ती प्रजनन केन्द्रका ४/४ वटा छावा हात्ती सहभागी थिए ।
छावा हात्तीले घम्साघम्सी गर्दै बल प्रहार गर्दा दर्शक एकोहोरो ताली बजाउँदै रमाइरहे । फुटबल हेर्न विभिन्न जिल्लादेखि कार्यालय प्रमुखसमेत उपस्थित थिए । फुटबल मैदान दर्शकले घेरिएको थियो । त्यस्तै टिकटको व्यवस्था गरिएको प्यारापिटमा समेत दर्शक भरिभराउ थिए । छावा फुटबलमा ४ टिम सहभागी थिए ।
प्रकाशित : पुस १६, २०७२ ०९:३९