प्रदेश सरकारबारे निर्णय गर्न टीकापुरमा नागरिक उन्मुक्तिको बैठक बस्दै
धनगढी — सुदूरपश्चिम प्रदेश सरकारबारेमा निर्णय गर्न नागरिक उन्मुक्ति पार्टी केन्द्रीय समितिको बैठक बुधबार टीकापुरमा बस्दैछ । पार्टी अध्यक्ष रञ्जिता श्रेष्ठ चौधरीका अनुसार बैठकले प्रदेश सरकारबारे पार्टीको धारणा तय गर्ने छ ।
नागरिक उन्मुक्ति पार्टीभित्र कांग्रेस नेतृत्वमा रहेको सुदूरपश्चिम प्रदेशको वर्तमान सरकारलाई समर्थन गर्ने या केन्द्रीय तहमा गठित नयाँ समिकरण अनुसार सरकार गठन गर्ने भन्नेमा फरकफरक धारणाहरु सार्वजनिक हुँदै आएका छन् ।
अध्यक्ष रञ्जिता चौधरी नयाँ समिकरणको पक्षमा छिन् भने संरक्षक रहेका रेशम चौधरीले कांग्रेस नेतृत्वकै वर्तमान सरकारलाई समर्थन गरेर जानुपर्नेमा धारणाहरू सार्वजनिक गर्दै आएका थिए ।
पार्टीका संरक्षक रेशम चौधरी देश बाहिर रहेका बेला बैठक बस्न लागेको हो । नयाँ गठबन्धनका शीर्ष नेताहरुले सुदूरपश्चिम सरकारको नेतृत्व नागरिक उन्मुक्तिलाई दिन सकिने विकल्पमा सहमत भइरहेको बताइन्छ । सुदूरपश्चिममा जुनसूकै सरकार बन्न नागरिक उन्मुक्ति पार्टी निर्णायक छ ।
प्रकाशित : चैत्र १४, २०८० ०९:५९