मजदुरलाई सहजै काम

धनगढी — धनगढी उपमहानगरपालिका–७ का शिव विक हिउँदका खाली समयमा काम गर्न भारत पस्थे । यसपालि उनले सदरमुकाम धनगढीमै काम पाए । मजदुरीको काम भए पनि घरनजिकै पाइरहेकाले काम खोज्न भारत नगएको उनले बताए ।

धनगढी बजारको मुख्य सडक फराकिलो पार्ने योजनाअनुसार उपमहानगरपालिकाले सडकको क्षेत्राधिकारका संरचना हटाउन सुरु गर्‍यो । धनगढी बजारका एकसाथ चार सय भवन, व्यापारिक सटरलगायतका संरचना भत्काउने र पुनर्निर्माणको कामले दैनिक ज्यालादारीमा काम गर्ने मजदुरले धनगढीमा काम पाउन थालेका हुन् ।

धनगढी आसपासका मात्रै नभएर उपमहानगरपािलका बाहिरका स्थानीय तहबाट समेत कामदार धनगढी आएका छन् । भजनी–३ का दुखीराम चौधरी दम्पती धनगढीमा मजदुरी काम खोज्न आएका छन् । धनगढीमा बढेको रोजगारीको अवसरले मंसिरदेखि उनले एक दिन पनि खाली बस्नु नपरेको बताए । उनीहरूले दिनको ७ सयसम्म ज्यालामा काम पाइरहेको बताएका छन् ।

घर निर्माणका ठेकेदार छेदुलाल चौधरीले धनगढी बजारका ४ सयभन्दा बढी घर एकसाथ तोडफोड र निर्माणले मिस्त्री र लेबरले सहजै काम पाएका छन् । उनका अनुसार अहिले धनगढीको बजार क्षेत्रमा चार हजार बढी लेबर र मिस्त्रीले काम पाएका छन् । निर्माणको कामले हार्डवेयरको व्यापारसमेत वृद्धि भएको उनको भनाइ छ । समयावधि दिएर उपमहानगरले मुख्य बजारको करिब अढाई किलोमिटरको सडक क्षेत्राधिकारभित्र परेका संरचना हटाउँदै छ । ती संरचना हटाउन, तोडफोड र पुनर्निर्माण हतारमा गर्नुपर्दा लेबर, मिस्त्रीको माग बढेको स्थानीय व्यवसायी विपिन आचार्यले बताए ।

कामदारसँगै धनगढीमा निर्माण सामग्रीको पनि माग बढेको छ । ‘उपमहानगरले दुई महिना मंसिर र पुसभित्र क्षेत्राधिकारको संरचना हटाउन भनेपछि घरधनीलाई पक्की ठूल्ठूला संरचना हटाउन समस्या भयो,’ आचार्यले भने, ‘एकैचोटि घर भत्काउने र निर्माण गर्ने रकमको व्यवस्थासँगै ठेकेदार खोज्नु पर्‍यो । यसले एकातिर ज्यालादारी मजदुरीलाई अवसर खुल्यो, हार्डवेयर व्यवसायीको व्यापार पनि बढ्यो तर घरधनी मर्कामा परे ।’

सुप्रिम हार्डवेयरका नरेन्द्र बोहराका अनुसार बजारमा संरचनाको तोडफोड र पुनर्निर्माणले सिमेन्ट, छड र इँटाको बिक्री बढेको छ । उनले हार्डवेयरको व्यापारमा वृद्धि भए पनि उधारो बढी गएको सुनाए । ‘कोरोनाकालपछि केही समययता सिमेन्ट, छडलगायतका निर्माण सामग्रीको व्यापारमा मन्दी थियो,’ बोहराले भने, ‘धनगढी बजारको पुनर्निर्माणले केही राहत दिएको छ ।’