भेरी ज्ञानोदय क्याम्पसको सभापतिमा नेविसंघका सिंह निर्वाचित
जाजरकोट — जाजरकोटको सदरमुकाम खलंगामा रहेको भेरी ज्ञानोदय बहुमुखी क्याम्पसको स्ववियु सभापतिमा नेपाल विद्यार्थी संघका प्रकाश सिंह निर्वाचित भएका छन् । आइतबार भएको निर्वाचनमा सिंहले १ सय १० मत ल्याएर निर्वाचित भएका हुन् ।
उनका प्रतिस्पर्धी अनेरास्ववियुका छविराज सिंहले ८० मत प्राप्त गरेका छन् । एकीकृत समाजवादी निकट अनेरास्ववियुका प्रेम विश्वकर्माले ४० मत प्राप्त गरेका छन् । यस्तै, सचिवमा अखिल क्रान्तिकारीका भूपेन्द्र नेपाली निर्वाचित भएका छन् । उनका प्रतिस्पर्धी अनेरास्ववियुका मालबहादुर सिंहले ६१ मत प्राप्त गरेका छन् । एकीकृत समाजवादी निकट विद्यार्थी संगठनका पुष्पराज वलीले ५१ मत प्राप्त गरेका छन् ।
कोषाध्यक्षका अखिल क्रान्तिकारीका विनोद राज गोसाई निर्वाचित भएका छन् । उनले १ सय २९ मत प्राप्त गरेका छन् । उनका प्रतिस्पर्धी प्रतीमा खत्रीले ७१ मत ल्याएकी छन् । सदस्यहरुमा युवराज सिंह र रमेश जैसी निर्वाचित भएका छन् । सिंहले १ सय ४२ मत प्राप्त गरेका छन् भने जैसीले १ सय ११ मत ल्याएर विजयी भएका हुन् ।
सदरमुकाम खलंगामा रहेको क्याम्पसमा नेपाल विद्यार्थी संघ र अखिल क्रान्तिकारीबीच चुनावी तालमेल भएको थियो । वामलोकतान्त्रिक गठबन्धनको पूरै प्यानल नै विजयी भएको निर्वाचन अधिकृत भिमेनन्दनाथ योगीले जानकारी दिए । भेरी ज्ञानोदय क्याम्पस मध्यपश्चिम विश्वविद्यालयको आगिंक क्याम्पसका रुपमा रहेको छ ।
प्रकाशित : चैत्र ६, २०७९ ०८:५६
