कर्णालीका मुख्यमन्त्री शर्मा र दुई मन्त्रीले लिए शपथ
काठमाडौँ — कर्णालीका मुख्यमन्त्री राजकुमार शर्मासँगै दुई मन्त्रीले पद तथा गोपनियताको शपथ लिएका छन् । प्रदेश प्रमुख तिलक परियारले बिहीबार मुख्यमन्त्री शर्मासहित दुई मन्त्रीलाई शपथ ग्रहण गराएका हुन् ।
बुधबार प्रदेश प्रमुख परियारले नेकपा माओवादी केन्द्रका नेता शर्मालाई संविधानको धारा १६८ को उपधारा (२) बमोजिम मुख्यमन्त्रीमा नियुक्त गरेका थिए । मुख्यमन्त्री शर्माले माओवादीका १३, एमालेका १०, राप्रपा र एकीकृत समाजवादीका १/१ गरी जम्मा २५ जना सांसदको समर्थनमा मुख्यमन्त्रीमा दाबी पेस गरेका थिए ।
एमाले र माओवादी केन्द्रले एक/एक जना सांसदलाई सरकारमा पठाएका छन् । माओवादी केन्द्रबाट मुगुका मंगलबहादुर शाही र एमालेबाट दैलेखका विनोदकुमार शाह बिनाविभागीय मन्त्री बनेका छन् । उनीहरुलाई पनि मुख्यमन्त्री शर्मासँगै प्रदेश प्रमुख परियारले पद तथा गोपनियताको शपथग्रहण गराए ।
माओवादी केन्द्रका शाही मुगु प्रदेशसभा (२) बाट र एमालेका शाह दैलेख निर्वाचन क्षेत्र २ प्रदेश भा (२) बाट निर्वाचित हुन् । शाह र शाहीलाई मुख्यमन्त्री शर्माले मन्त्रीमा नियुक्त गरेका हुन् ।
प्रकाशित : पुस २८, २०७९ १६:३८
