२८.१२°C काठमाडौं
काठमाडौंमा वायुको गुणस्तर: १५२

पढाइ निःशुल्क, उत्तीर्ण हुँदा एक लाख

गाउँघरमै बसेर स्थानीय क्याम्पस पढ्न विद्यार्थीलाई प्रोत्साहन गर्ने योजनामा विदेश पुगेका पैयुँवासीको हातेमालो
अगन्धर तिवारी

पर्वत — सामुदायिक क्याम्पसमा शुल्क चर्को लिएको भन्दै विरोधका खबर आइरहँदा पर्वतको एक क्याम्पसमा भने विद्यार्थीले निःशुल्क पढ्न पाउने मात्रै होइन, सित्तैमा पाठ्यपुस्तक र पोसाक पाउँछन् । त्यतिमात्रै नभएर नियमित उत्तीर्ण हुनेले एक लाख रुपैयाँ पुरस्कारसमेत पाउँछन् । पैयुँ गाउँपालिकाको हुवास बहुमुखी क्याम्पसले विद्यार्थी आकर्षित गर्न यस्तो रणनीति ल्याएको हो ।

पढाइ निःशुल्क, उत्तीर्ण हुँदा एक लाख

उच्च शिक्षाका लागि सहर जाने प्रवृत्तिले गाउँघरमै बसेर पढ्ने विद्यार्थी घटेका छन् । गाउँमै पढ्नका लागि विद्यार्थी आकर्षित गर्न क्याम्पसले पोसाकदेखि पाठ्यपुस्तकसमेत निःशुल्क दिन थालेको हो । क्याम्पसको कार्यक्रमलाई सघाउन हाल अमेरिकामा व्यवसाय गर्दै आएका हुवासकै राजेन्द्र श्रेष्ठ र अञ्जना श्रेष्ठले नियमित पास हुने विद्यार्थीलाई जनही एक लाख रुपैयाँका दरले प्रोत्साहन पुरस्कार घोषणा गरेका हुन् । आंशिक रूपमा पास हुने विद्यार्थीलाई जनही ४० हजारका दरले पुरस्कार घोषणा गरेका छन् । उनीहरूले घोषणा गरेको पुरस्कारबापतको पहिलो वर्षको प्रोत्साहन रकम क्याम्पसका दुई विद्यार्थीले प्राप्त गरिसकेका छन् । २ वर्षअघि गरेको घोषणाअनुसार आंशिक रूपमा पास हुने निर्मला भट्टराई र सरिता परियारले ४०/४० हजारका दरले पुरस्कार रकम प्राप्त गरिसकेको क्याम्पसले जनाएको छ । ‘राम्रो पढेर नियमित पास हुँदा आफ्नै लागि राम्रो हो,’ परियारले भनिन्, ‘हामीले पाएको प्रोत्साहन रकमले पढाइमा हौसला मात्रै मिलेको छैन, उच्च शिक्षा पढ्ने खर्चको जोहो पनि भएको छ । यसले हौसला मिलेको छ ।’ अर्की विद्यार्थी भट्टराईले पाएको प्रोत्साहन रकमले स्नातकोत्तर तह अध्ययनमा सहज भएको बताइन् ।

क्याम्पसले ल्याएको यस्तो योजनामा साथ दिन हाल अमेरिका, जापानलगायतका मुलुकमा रहेका पैयुँवासीले पनि सहयोग गर्दै आएका छन् । पैसा नभएर उच्चशिक्षा अध्ययनका लागि अन्योलमा परेका परिवारले क्याम्पसले ल्याएको योजना मन पराएका छन् । २ वर्षदेखि कार्यान्वयनमा ल्याएको योजनाले विद्यार्थीको भर्ना संख्या उत्साहप्रद रहेको क्याम्पस प्रमुख देवीप्रसाद काफ्लेले बताए । ‘पहिले ८/१० जनामात्रै भर्ना हुन्थे,’ उनले भने, ‘अहिले तेब्बर विद्यार्थी

छन् ।’ गतवर्ष २८ जना भर्ना भएकामा चालु वर्ष ३० जना विद्यार्थी भर्ना भएको उनले बताए । क्याम्पसमा व्यवस्थापन संकायको मात्रै पढाइ हुन्छ । क्याम्पसले विद्यार्थीलाई शैक्षिक कक्षाका अतिरिक्त दैनिक एक घण्टा निःशुल्क कम्प्युटर कक्षासमेत सञ्चालन गर्दै आएको छ ।

हुवासका गोपी भुसाल, हिमाल भट्टराई, सरोज श्रेष्ठ, अर्जुनकिशोर न्यौपानेलगायतले नियमित प्रोत्साहन रकमका लागि अक्षयकोष स्थापना गरेका छन् । क्याम्पस प्रमुख काफ्लेका अनुसार प्रोत्साहन स्वरूप हरेक वर्ष ३ लाख ६० हजारका दरले पुरस्कार दिने घोषणा गरेका छन् । क्याम्पसको योजनाअनुसार पहिलो वर्षको प्रोत्साहन रकम विद्यार्थीले पाइसकेका छन् । क्याम्पसको योजनामा पालिकाले समेत सहयोग गरेको छ । अभिभावकहरूले सहयोग गरेसँगै पैयुँ गाउँपालिकाले गतवर्षदेखि क्याम्पसको शैक्षिक विकासका लागि बर्सेनि ५ लाखका दरले अनुदान रकम उपलब्ध गराउँदै आएको अध्यक्ष राज मल्ल ठकुरीले बताए ।

प्रकाशित : चैत्र १३, २०७९ १०:२७
प्रतिक्रिया
पठाउनुहोस्
जनताको राय

मंसिरदेखि दूधको भुक्तानी नपाएपछि विरोधमा उत्रिएका किसानमाथि प्रहरीले धरपकड गरेकोबारे तपाईंको के टिप्पणी छ ?

x