बुटवल-नारायणगढ खण्डमा कालोपत्र सुरु

कालोपत्र गरिएको सडक १० मिटरभन्दा बढी फराकिलो छ । राजमार्गको मेन ट्र्याकअन्तर्गत पहिलो पटक परीक्षणका रूपमा कालोपत्र सुरु भएको हो । भेंडाबारी खण्डको यो क्षेत्रमा आउँदो २ साताभित्र एक किलोमिटर कालोपत्र गरिनेछ । धमाधम पिच गर्ने लक्ष्य रहे पनि सरकारले जिल्लाभरिका क्रसर उद्योग बन्द गरिएका कारण गिट्टीको अभावमा काम रोकिने झाले बताए । देशभरिका क्रसर उद्योग बन्द छन्, हामीलाई चाहिने मसिनो गिटी र बालुवाको अभावमा काम रोकिने अवस्था छ । क्रसर उद्योगबाट माल आउन सके आउँदो असारअगावै कम्तीमा १० किलोमिटर पक्की सडक फाइनल गरिने लक्ष्य रहेको छ ।

राजमार्गमा फिलिंग्सको काम भइरहँदा बन्द रहेका क्रसरका कारण काम अघि बढाउन अप्ठ्यारो परेको छ । ग्राभेल हालेर पुर्ने काम सकिए पनि माथिल्लो भाग सम्याउन क्रसरका विभिन्न साइजको गिट्टी आवश्यक पर्छ । बुटवल–नारायणगढ सडकको १ सय १४ किलोमिटर राजमार्ग फराकिलो पार्न चाइनिज ठेकेदार कम्पनीले ४२ महिनाअघि ठेक्का लिएको हो । पुस मसान्तसम्म राजमार्ग फराकिलो पार्ने काम २३ प्रतिशत मात्र पूरा भएको छ ।