वनको डढेलो बस्तीमा फैलिँदा तीन घर र गोठ जले
सिन्धुली — गोलन्जोर गाउँपालिका-७ माथिल्लो बारास्थित पञ्चकन्या सामुदायिक वनमा आइतबार बिहान लागेको आगलागी बस्तीमा सल्किँदा स्थानीयको घरगोठ जलेर लाखौँको धनमाल नष्ट भएको छ । आगलागीबाट तीन वटा घर, एउटा गोठ र एउटा आरन जलेको छ ।
प्रहरीका अनुसार आगलागीबाट भक्तबहादुर श्रेष्ठको घर र गणेश बहादुर थापाको गोठ जलेको छ । आगलागीबाट रामबहादुर विकको आरन समेत जलेर नष्ट भएको छ । आरन जलेपछि फलामको काम गरेर गुजारा चलाउँदै आएका विकको दैनिकी बिथोलिएको छ ।
विकको घर, भाडावर्तन, अन्नपात, लत्ता–कपडा, गोठ, आरन जलेर नष्ट हुँदा आठ लाख बराबरको क्षति भएको जिल्ला प्रहरी कार्यालयका प्रहरी नायव उपरिक्षक चिरञ्जीवी दाहालले जानकारी दिए ।
सुख्खायाम सुरु भएसँगै सिन्धुलीमा आगलागीका घटनाहरु बढ्न थालेका छन् । शनिबारमात्रै गोलन्जोर-१ रिठ्ठाबोटका शेरबहादुर चौहानको घरमा आगलागी हँदा २ वटा घर र २ वटा गोठ जलेका थिए ।
आगलागीका कारण घर गोठमा रहेको अन्नपात, लत्ताकपडा भाडाकुडा, सुन ८ तोला, धान ४० मुरी जलेर नष्ट भएको छ । आगलागीमा परी चौहानका खसीबाख्रा ७ वटा, कुखुरा ९ वटा जलेर मरेका छन् । आगलागीबाट २० लाखको क्षति भएको प्रहरीको आंकलन छ ।
प्रकाशित : चैत्र ४, २०८० १५:१६