सिन्धुली — निर्माण सुरु भएको दशक बित्दासमेत पुल अलपत्र परेपछि मध्यपहाडी राजमार्गअन्तर्गत सिन्धुलीको फिक्कल गाउँपालिका–६ मा स्थानीयले दबाबस्वरुप दिनहुँ यातायात अवरुद्ध गर्दै आएका छन् ।

राजमार्गको सोखुखोलामा निर्माणाधीन पक्की पुल छिटो सम्पन्न गर्न दबाब दिने उद्देश्यले यातायात अवरोध गर्नुपरेको स्थानीयको भनाइ छ ।

शुक्रबार तीनघण्टा चक्काजाम गरेका स्थानीयले शनिबार बढाएर बिहान ८ बजेदेखि दिउँसो एक बजेसम्म पुर्‍याएका छन् । चक्काजामका कारण मध्यपहाडी राजमार्ग भएर ओखलढुङ्गा, सोलुखुम्बु,भोजपुर, उदयपुर र सिन्धुलीबाट राजधानी आवतजावत गर्ने यात्रु तथा सवारीसाधन बाटैमा अलपत्र परेका छन् ।

स्थानीय रामप्रसाद भण्डारीका अनुसार पुल निर्माण ठेक्का सुरुमा पप्पु कन्स्ट्रक्सन पाएको थियो । पप्पुले अलपत्र पारेर छाडेपछि ठेक्का तोडेर लोहनी–आत्रेय जेभीलाई दिइएको थियो । जेभीले तीन वर्ष बित्दासमेत सम्पन्न नगरेपछि स्थानीयहरु चक्का जाम गरेर आन्दोलनमा उत्रिएका हुन् । तत्काल निर्माण कार्यको थालनी गरी सम्पन्न गर्ने वातावरण तयार नभए दिनहुँ यातायात अवरोध गरी दबाब दिइने स्थानीय भण्डारीले जनाए ।

गाउँपालिका अध्यक्ष पार्वती सुनुवारका अनुसार पुल निर्माण सम्पन्न गर्नका लागि सम्बन्धित निकायमा बारम्बार ताकेता गर्दा पनि बेवास्ता गरिएको छ । पुलको पिल्लर ढलान भएको स्ल्याभसमेत पूरा भएको छैन । सोखुखोलामा पुल नहुँदा वर्षा आउने बाढीले यातायात अवरुद्ध हुने गरेको छ ।