जनकपुर — मधेस प्रदेशका पूर्वमुख्यमन्त्री लालबाबु राउतले संघीय सरकार र पार्टीको गुणगान गाएर प्रदेशको अधिकार प्राप्त हुन नसक्ने बताएका छन् । ‘संघीय सरकारको गुणगान गाएर सडकको हवल्दारले समेत टेर्दैनन्,’ राउतले भने,‘संघीय सरकार र पार्टीको गुणगान  पार्टीको मञ्चमा गर्नुस् । प्रदेशसभामा पार्टीको गुणगान गाउनुको औचित्य छैन ।’ 

बुधबार प्रदेशसभा बैठकमा बोल्दै राउतले प्रदेश प्रहरी ऐन, प्रदेश निजामती ऐन बनाएका प्रदेश सरकारका सचिवलाई सरुवा गरेर संघीयतालाई समाप्त गर्ने षड्यन्त्र भइरहेको बताए ।

राउतले प्रदेश सरकारलाई सरकारको अनुभूति गर्न प्रहरी प्रशासन ल्याउनैपर्ने बताए । संघीयता कार्यान्वयनका लागि अदालतमा एकपछि अर्को मुद्दा गर्नु परेको अनुभव उनले सुनाए । काग्रेसले सरकारलाई विश्वासको मत दिने भएकोले प्रदेशमा सता पक्ष र विपक्ष नरहेको उल्लेख गर्दै आजको अवश्यक्ता पनि यही रहेको राउतले बताए ।

संविधानबाट प्राप्त अधिकार कार्यान्वयन गर्न प्रदेश सरकारले कानुन बनाए पनि संघीय सरकारकै कारण कार्यान्वयन हुन नसकेको राउतले बताए । ‘प्रदेश सरकार विकास युनिट होइन,’ राउतले भने, ‘संविधानको सूचीमा रहेको अधिकार प्राप्त गरी कार्यान्वयन गर्ने निकाय प्रदेश सरकार हो । संविधानले दिएको अधिकारका लागि सबै दल एक भएर अगाडि बढ्नुपर्छ ।’