काठमाडौँ — पछिल्लो समयमा बैंक तथा वित्तीय संस्थाविरुद्ध चलिरहेका अराजक गतिविधि र सडक आन्दोलनका कारण अन्तर्राष्ट्रिय जगतमा नेपालको छवि बिग्रन सक्ने भन्दै  बैंकरहरुले चिन्ता जनाएका छन् । अन्तर्राष्ट्रिय जगतले विस्तारै नेपालको आर्थिक क्रियाकलापलाई विश्वास गर्न लागिरहेका बेला बैंकविरुद्धका गतिविधिले नकारात्मक असर पर्ने उनीहरुको धारणा छ ।

अर्थतन्त्रका बाह्य सूचकहरु सकारात्मक भएको, तरलताको अवस्था सहज भएको, ब्याजदर घट्दो क्रममा रहेको अवस्थामा बैंक विरुद्धका गतिविधि भइरहँदा आफूहरुलाई पनि काम गर्न गाह्रो भएको र अन्तर्राष्ट्रिय जगतमा नकारात्मक सन्देश जाने नेपाल बैंकर्स संघका अध्यक्ष सुनिल केसीले बताए । संघले बिहीबार आयोजना गरेको नियमित पत्रकार सम्मेलनमा बोल्दै अध्यक्ष केसीले अन्तर्राष्ट्रिय जगतमा नेपालको छवि बिग्रिएमा झनै गाह्रो हुने बताए । ‘त्यसै पनि हाम्रो मुलुकमा अपेक्षित रुपमा प्रत्यक्ष विदेशी लगानी आउन सकेको छैन,’ उनले भने, ‘यस्तो अवस्थामा नेपालको बारेमा नकारात्मक गतिविधि भइरहँदा झनै असर पर्न सक्छ ।’ अन्तर्राष्ट्रिय जगतमा नेपालको छवि बिग्रिँदा अत्यावश्यक वस्तु आयातका लागि समेत अप्ठेरो हुने उनले बताए ।

पछिल्ला केही महिना यता वित्तीय प्रणालीमा तरलता सहज अवस्थामा रहेको र विस्तारै कर्जा माग बढ्न थालेको उनले बताए । ब्याजदर घट्न थालिसकेको र आउँदा दिनमा झनै घट्ने भएकाले कर्जा प्रवाह पनि बढ्ने उनको भनाइ छ । परिस्थितिजन्य कारणले ऋणीको ऋण तिर्ने क्षमतामा कमी आएकाले बैंकहरुको खराब कर्जा केही बढे पनि आत्तिहाल्नु पर्ने अवस्था नभएको केसीको दाबी छ ।