संक्रमणकालीन न्यायको विषय अन्तर्राष्ट्रिय मापदण्डअनुसार टुंग्याउनुपर्छ : अध्यक्ष ओली

उनले अन्तर्राष्ट्रिय समुदायलाई मान्य हुनेगरी सर्वोच्च अदालतले गरेको फैसलाका आधारमा अगाडि बढ्नुपर्ने बताए । त्यस्तै पीडितले न्याय पाउनुपर्नेसमेत बताए । अध्यक्ष ओलीले पीडितलाई न्याय नदिने गरी फास्ट ट्र्याकको नाममा अगाडि बढाउन खोजिएको भन्दै त्यसो गरिएमा आफूहरूले विरोध गर्ने उनले बताए ।

अध्यक्ष ओलीले सरकारले फागुन १ गतेलाई जनयुद्ध दिवसको रुपमा सार्वजनिक बिदा दिएकोप्रति असन्तुष्टि जनाउादै सो बिदालाई पात्रोबाट हटाउने चेतावनी दिए । माओवादीहरूले गरेको युद्ध जनयुद्ध नभएर हिंसा भएको भन्दै उनले हिंसा दिवसलाई राष्ट्रिय उत्सवको रुपमा मनाउन नसकिने बताए । उनले सहिद घोषणा पनि सरकारले छानबिन नगरिकन गरेको भन्दै त्यसको विरोध गरे ।

अध्यक्ष ओलीले प्रधानमन्त्री पुष्पकमल दाहालले भारत भ्रमणको समयमा भारतले नेपालको सीमा मिचेको विषय उठ्ने/नउठ्ने हो, त्यो हेरिरहेको बताए । सीमा मिचिएको विषय साउती गर्ने विषय नभएको भन्दै उनले सार्वजनिक रुपमा छलफल गर्नुपर्ने बताए ।