दुई आणविक शक्तिको प्रतिस्पर्धाले नेपालमा नयाँ जटिलता सिर्जना गरेको छ : बाबुराम भट्टराई

तर नेपालले आर्थिक लाभका लागि चीन, भारत र पश्चिमा शक्तिहरूमध्ये कुनैसँग निकट हुनुपर्दा उनीहरुको एकअर्कासँगको शक्ति र प्रभावको प्रतिस्पर्धाबाट टाढै रहनुपर्ने भट्टराईले सुझाव दिएका छन् । यस्तै प्रायः आर्थिक फाइदाको विषय शक्ति राष्ट्रहरूको सुरक्षा चासोसँग जोडिएको हुनाले नेपालका लागि यो जटिल बन्दै गएको भट्टराईको भनाइ थियो ।

शुक्रबार काठमाडौंस्थित नेपाली सेनको 'अर्थतन्त्र र राष्ट्रिय सुरक्षा' विषयक कार्यक्रमलाई सम्बोधन गर्दै भट्टराईले यस्तो बताएका हुन् । यस क्रममा उनले अहिलेको विश्व राजनीति गठबन्धनको राजनीति पार गरिसकेको भन्दै कुनै गठबन्धनमा नेपाल संलग्न हुन नहुने संकेत गरेका थिए । नेटो लगायतका गठबन्धनलाई लक्षित गर्दै नेता भट्टराईले अहिलेको समय 'पोस्ट अलायन्स' मा पुगिसकेको बताएका थिए ।

यस क्रममा भट्टराईले नेपालले आफ्ना कमजोरीहरूलाई ध्यानमा राख्दै, आर्थिक सुरक्षालाई राष्ट्रिय सुरक्षाको अभिन्न अंग बनाउनुपर्ने बताएका थिए । साथै आर्थिक विकासले देशको सुरक्षालाई पनि बलियो बनाउने उनको तर्क थियो ।

यस्तै नेपाल जलवायु परिवर्तनको तीव्र असरको जोखिममा रहेको भन्दै यस्तो असर अर्थतन्त्रसँग पनि सम्बन्धित रहने भएकाले यसलाई सुधारका लागि पहल गर्नुपर्नेमा उनले जोड दिएका थिए । 'यदि हाम्रो अर्थतन्त्र बलियो छ भने हामीले यस्ता समस्या समाधान गर्न सक्नेछौं,' भट्टराईले भनेका छन् ।

यसबाहेक नेपालका लागि पछिल्लो समय साइबर आक्रमण लगायतका नयाँ किसिमका सुरक्षा खतरा पनि देखिएको उनले बताएका थिए । केही समयअघि त्रिभुवन अन्तर्राष्ट्रिय विमानस्थलमा सर्भर डाउन भएको सन्दर्भ जोड्दै नेता भट्टराईले डेटा जासूसी, गलत सूचना लगायतका खतरा देखिएको औंल्याएका थिए ।

यसैबीच नेता भट्टराईले हालको समयमा क्षेत्रीय अखण्डता मुख्य कुरा भएको भन्दै शक्तिशाली राष्ट्रहरूको सैन्य आक्रमणको खतरा औंल्याएका थिए । युक्रेनविरुद्ध रुसी आक्रमणको सन्दर्भ जोड्दै ठूला देशहरूले आफ्ना बृहत् स्वार्थका लागि कमजोर छिमेकीहरूमाथि सैन्य आक्रमण गर्नसक्ने खतरा रहेको उनको भनाइ थियो ।