दलहरू विचारधारामा अस्पष्ट हुँदा लोकतन्त्र कमजोर बन्दै छ : झाँक्री

उनले दलहरूमा विचारधाराको अस्पष्टता र सत्ताप्राप्ति बाहेक सहकार्यको निश्चित मापदण्ड नहुँदा सरकारमा बसेका मन्त्रीहरूले संविधान र व्यवस्थाको विरोध गर्ने र प्रतिपक्षमा बसेका शक्तिहरूले संविधान र व्यवस्थाको रक्षा गर्नुपर्ने स्थिति पैदा भएको बताइन् । उनले त्यही कारण लोकतन्त्रमाथि खतरा पैदा हुने बताइन् ।

बुधबार काठमाडौंमा भएको नेपाली राजनीति र लोकतान्त्रिक संस्कारको सवाल विषयक विचार गोष्ठीमा बोल्दै उनले राजनीतिक दलहरूले व्यवस्था परिवर्तन गरे पनि डेलिभरीमा खरो उत्रिन नसक्दा व्यवस्थामाथि विषवमन गर्ने ठाउँ भेटिएको बताइन् ।

‘राजनीतिक दलहरू विचारधारामा प्रस्ट हुनुपर्छ । को दक्षिणपन्थी हो ? के पूर्वपन्थी हो ? को वामपन्थी हो ? विचारधारामा सबै प्रस्ट हुनुपर्छ । नत्र एक रात कसले‚ कता काँध जोडेको छ; अर्को रात फेरि अर्कैसँग काँध जोडेको छ । यो सुहाउँदो भएन,’ उनले भनिन्, ‘हामीले कम्तीमा विचारधारालाई प्रमुख आधार बनाएर प्रस्ट भएर अघि बढ्नुपर्ने हुन्छ । त्यसो भयो भने लोकतन्त्र र यसका संस्थाहरूले पनि ठिक ढंगले काम गर्न सक्छन् ।’

उनले व्यवस्था परिवर्तन र संविधान निर्माणमा योगदान गर्ने राजनीतिक दलहरूले डेलिभरी गर्न नसकेकै कारण उनीहरूको विरुद्धमा जनमत सिर्जना भए पनि आत्तिनुपर्ने अवस्था भने नरहेको बताइन् ।