कैदी मृत्यु प्रकरणः छानबिन गर्ने जिम्मा सीआईबीलाई दिन सुझाव

स्रोतका अनुसार समितिले कैदीबन्दीको मृत्यु प्रकरणबारे उच्चस्तरीय छानबिन गर्ने जिम्मा नेपाल प्रहरीको केन्द्रीय अनुसन्धान ब्युरोलाई दिन सुझाव दिएको छ ।

जेलभित्र अचानक बिरामी परेका भक्तबहादुरको उपचारक्रममा वैशाख २१ मा मृत्यु भएपछि र उनको साथबाट जेलभित्र शोषणको शृंखला रहेको आशयको पत्र फेला परेपछि गृहमन्त्रीले छानबिन समिति बनाएका थिए । त्रिवि शिक्षण अस्पताल महाराजगन्जले पोस्टमार्टममा मृत्युको कारण पत्ता लाग्न नसकेको रिपोर्ट दिएपछि सुनवारको मृत्यु थप रहस्यमय बनेको थियो । कान्तिपुरसँग कुरा गर्दै समितिका एक सदस्यले नख्खु जेलभित्र कैदीबीच शक्तिसंघर्ष रहे पनि भक्तबहादुरको मृत्युको कारण शक्तिसंघर्ष नभएको बताए ।

समितिले भक्तको मृत्युका पछाडि जेलभित्रकै केही कैदीको भूमिका रहेको औंल्याउँदै त्यसबारे थप छानबिनको जिम्मा केन्द्रीय अनुसन्धान ब्युरोलाई दिनुपर्ने सुझाएको छ । समितिले गृहमन्त्री रामबहादुर थापालाई प्रतिवेदन बुझाइसकेको छ ।

कारागार व्यवस्थापन विभागका निर्देशक कृष्णप्रसाद अधिकारीको नेतृत्वमा गठित पाँच सदस्यीय छानबिन समितिमा ललितपुरका सहायक प्रमुख जिल्ला अधिकारी डमरुप्रसाद निरौला, महानगरीय अपराध महाशाखाका डीएसपी सोमेन्द्रसिंह राठौर, गृहका शाखा अधिकृत घनश्याम घिमिरे र कृष्णप्रसाद सापकोटा थिए । नख्खु कारगारभित्र आर्थिक चलखेल र शक्तिसंघर्षका निम्ति अनेकन नाइकेहरू खडा गरिएको समितिले प्रतिवेदनमा उल्लेख गरेको छ ।

जेलभित्र गैरकानुनी रूपमा पानी नाइके, टेलिफोन नाइके, बिजुली नाइकेजस्ता अनेकन पद खडा गरिएको र यस्तो अभ्यास कारागार ऐन, २०१९ विपरीत भएको समितिको ठहर छ ।