सेलेब्रिटी रोबोट ‘सोफिया’ ले भनिन्- 'प्रविधिको प्रयोगले गरिबी हटाउन सकिन्छ'- समाचार - कान्तिपुर समाचार
कान्तिपुर वेबसाईट
AdvertisementAdvertisement

सेलेब्रिटी रोबोट ‘सोफिया’ ले भनिन्- 'प्रविधिको प्रयोगले गरिबी हटाउन सकिन्छ'

विजय तिमल्सिना

काठमाडौँ — चर्चाको शिखरमा रहेकी सेलेब्रिटी रोबोट ‘सोफिया’ ले नेपाल जस्तो विकासोन्मुख देशमा प्रविधिले गरिबी हटाउन सहयोग पुर्‍याउने बताएकी छन् । बुधबार राजधानीमा राष्ट्रसंघीय विकास कार्यक्रम (यूएनडीपी) ले आयोजना गरेको ‘सार्वजनिक सेवाका लागि प्रविधि’ विषयक सम्मेलनमा उनले प्रविधिको प्रयोगले सुशासन कायम राखी भ्रष्टाचारमुक्त समाज बनाउने सक्ने बताइन् । 

नेपालमा प्रविधिको विकास द्रुत गतिमा भइरहेकोले बताउँदै उनले नेपालले प्रविधिलाई सही तरिकाले अवलम्बन गर्न सके चाँडै नै विकासको गतिमा लम्कने विश्वास आफूलाई रहेको जनाइन् ।


उनी कार्यक्रममा सहभागी हुन मंगलबार काठमाडौं ओर्लिएकी थिइन् । उनी मानिससरह नागरिकता पाउने पहिलो रोबोट हुन् । उनलाई साउदी सरकारले ४ महिनाअघि महिलाका रूपमा नागरिकता दिएको हो ।


मानव स्वरूप भएकी सोफियालाई हङकङको कम्पनी हयानसन रोबोटिक्सले निर्माण गरेको हो । सोफियाको निर्माण २०१५ मा भएको थियो भने २०१६ मा उनलाई अमेरिकामा आयोजित एक कार्यक्रममा सार्वजनिक गरिएको थियो । साउदी सरकारले उनलाई ‘मानव’का रूपमा नागरिकता दिएपछि उनको चर्चा चुलिएको हो । त्यसयता सोफिया विश्वभर हुने विभिन्न सार्वजनिक कार्यक्रममा आकर्षणको केन्द्र बन्दै आएकी छन् । मानवीय स्वरूप दिन उनको अनुहार दिवंगत बेलायती कलाकार अड्रे हेपबनसँग मिल्दोजुल्दो बनाइएको छ । सोफियाले अनुहारबाट ६२ भन्दा बढी भावभंगी देखाउन सक्छिन् ।


भिडियो हेर्नुहोस्ः





प्रकाशित : चैत्र ७, २०७४ १०:१३
प्रतिक्रिया
पठाउनुहोस्

रूसी कूटनीतिज्ञले बेलायत छाडे

बीबीसी

मस्को — बेलायतको सालिसबरीमा गतसता पूर्वरूसी गुप्तचरमाथिको आक्रमणपछि निष्कासित रूसी कूटनीतिज्ञ तथा उनीहरूका परिवारले बेलायत छाडेका छन् ।

लन्डनको केन्सिङटनस्थित रूसी दूतावासबाट कूटनीतिक गाडी तथा अन्य गाडीमा उनीहरू निस्केका थिए ।

रूसी दूतावासले बेलायतले देश छाड्न दिइएको समयसीमा सकिएकाले कूटनीतिज्ञ र उनीहरूका परिवार गरी ८० जनाले बेलायत छाडेको बताएको छ । मंगलबार दूतावासबाहिर देखिएको सानो भीडले गाडी चढ्न लागेका मानिसलाई बिदाइको अभिवादन गरेका देखिन्थ्यो ।

६६ वर्षीय पूर्वगुप्तचर स्क्रिपल र उनकी ३३ वर्षीया छोरी युलियामाथि गत मार्च ४ मा आक्रमण भएपछि दुई देशबीच तनाव बढेको हो । बेलायतले रूसमाथि प्रतिबन्ध लगाउनेबारे पनि निर्णय लिने बीबीसीले जनाएको छ । प्रधानमन्त्री टेरेजा मेले त्यसबारे निर्णय गर्न सुरक्षा परिषद्को बैठकसमेत डाकेकी छन् ।

गत बुधबार बेलायती प्रधानमन्त्री टेरेजा मेले रूसका पूर्वगुप्तचर र उनकी छोरीमाथि स्नायु प्रणालीमा असर गर्ने रसायन प्रयोगको घटनाबारे व्याख्या गर्न अस्वीकार गरेपछि २३ रूसी कूटनीतिज्ञलाई देशनिकाला गरेकी थिइन् । मेले ‘आफ्नो भूभाग र बेलायती नागरिकविरुद्ध रूसले गर्ने कुनै पनि कार्य सहय नहुने’ कडा प्रतिक्रिया दिएकी थिइन् ।

बेलायती निर्णयको जवाफमा रूसले पनि २३ कूटनीतिज्ञलाई निष्कासित गरेको थियो । रूसी विदेश मन्त्रालयले उनीहरूलाई रूस छाड्नका लागि एक साताको समय दिएको थियो । यससँगै रूसले मस्कोस्थित ब्रिटिस काउन्सिल र सेन्ट पिटर्सवर्गस्थित काउन्सुलेट कार्यालयसमेत बन्द गर्ने निर्णय गरेको थियो ।

रूसी विदेशमन्त्रीले शनिबार मस्कोस्थित बेलायती दूतावासमा कार्यरत २३ कर्मचारीलाई ‘पर्सोना नन ग्रेटा’ अर्थात् रूसमा बस्न वा प्रवेश गर्न नपाउने सूचीमा उल्लेख गरेको थियो । निवृत्त गुप्तचर कर्नेल स्क्रिपल सन् २०१० मा रूसी जेलबाट मुक्त भएलगत्तै बेलायत आएका थिए ।

उनी सन् २००६ मा बेलायतका लागि जासुसी गरेको अभियोगमा जेल परेका थिए । उनी युरोपस्थित रूसी जासुसहरूको परिचय बेलायती गुप्तचर संस्था ‘एमआई १६’ लाई दिएपछि पक्राउ परेका थिए । उनकी छोरी युलिया ग्यास आक्रमण हुनुभन्दा एक दिनअघि मार्च ३ मा बेलायत पुगेकी थिइन् ।

प्रकाशित : चैत्र ७, २०७४ ०९:२३
पूरा पढ्नुहोस्
प्रतिक्रिया
पठाउनुहोस्
×