दाङ — दाङमा सिण्डिकेट विवादका कारण आज यातायात व्यवसायी र प्रहरीबीच झडप भएको छ । झडपमा राप्ती अञ्चल सार्वजनिक यातायात व्यवसायी समितिका अध्यक्ष सुरेश हमाल, दाङ यातायात प्रालीका अध्यक्ष पिताम्बर कँडेल र राप्ती समितिका कर्मचारी बिरेन्द्र केसी घाइते भएका छन् ।
हमाल र कँडेलको दाङमै उपचार भइरहेको छ भने केसीलाई थप उपचारका लागि नेपालगञ्ज लगिएको छ । झडपमा एक प्रहरी पनि घाइते भएको इलाका प्रहरी कार्यालय तुलसीपुरले जानकारी दिएको छ ।
झडपपछि राष्ट्रिय यातायात व्यवसायी महासंघ राप्तीले आज राप्ती अञ्चलभर यातायात अबरुद्ध गरेको छ ।
तुलसीपुरका बिभिन्न चोकमा गाडी तेस्र्याएर यातायात अबरुद्ध गरिएको छ । यातायात अबरुद्ध गर्ने तीन जनालाई नियन्त्रणमा लिएको ईलाका प्रहरी कार्यालय तुलसीपुरका प्रमुख डिएसपी कृष्ण प्रसाईले बताए ।
आज बिहान दाङबाट रुकुम जान थालेको मालिका कालिका यातायात प्रालीको गाडीमा तुलसीपुरमा तोडफोड हुन थालेपछि प्रहरीले भिड नियन्त्रण गर्ने क्रममा झडप भएको डिएसपी प्रसाईले बताए । अहिले समस्या समाधानका लागि राप्ती अञ्चल प्रहरी कार्यालयमा छलफल भइरहेको छ ।
प्रकाशित : वैशाख २५, २०७३ १५:५१
