दौडधुपमा भलिबल सुन्दरी पनि

दीपक परियार, बिना थापा

लेखनाथ — ‘भलिबल सुन्दरी’ को उपमा पाएकी सिपोरा गुरुङलाई पनि यति बेला राजनीति लागेको छ । ‘घलेक : दी साइन अफ लभ’, ‘याम्फावती’ र ‘भुइँमान्छे’ जस्ता फिल्मकी नायिका समेत रहेकी सिपोरा चुनावी सभातिर बढी देखिन्छिन् । आफ्ना आफन्त सरस्वती गुरुङ नेपाली कांग्रेसबाट पोखराको उपमेयरमा उठेपछि उनलाई पनि राजनीतिक कार्यक्रमले तानेको हो ।

राजनीतिक आस्थाको आधारमा भने प्रचारमा नहिँडेको उनले बताइन् । ‘पार्टीभन्दा पनि राम्रो मान्छेलाई जिताउनुपर्छ भनेर लागेकी हुँ,’ उनले भनिन् । पार्टीविशेषभन्दा पनि आफू ‘युवा पुस्ता पनि राजनीतिमा सहभागी हुनुपर्छ’ भनेर हिँडेको उनले सुनाइन् । ‘फेसबुकमा स्टाटस लेखेर नेतालाई गाली गर्दैमा चेन्ज आउनेवाला छैन,’ उनी भन्छिन्, ‘चेन्ज ल्याउन युवा फिल्डमै उत्रिनुपर्छ ।’

राजनीतिमा पनि ‘इन्ट्ेरस्ट’ रहेको बताउने सिपोरालाई भविष्यमा नेता बन्ने मन छ । ‘पछि के हुन्छ थाहा छैन, तर इन्ट्रेस्ट छ,’ चुनाव प्रचारमा हिँड्नुको गुह्य उनले खोलिन् । राजनीतिमा रुचि राख्ने यी सुन्दरी आफैं किन उम्मेदवार हुन चाहिनन् होला ? ‘अहिले बेस बनाउँदै छु,’ अहिले नै नहोमिनुको कारण खोलिन् उनले, ‘बहकाउमा लागेर भएन । आफैंले आफैंलाई चिन्नुपर्छ । मेरो विचारमा मैले राजनीति गर्ने बेला भइसकेको छैन ।’

पोखरालाई आवश्यक विकास, पूर्वाधारका बारेमा पनि उनी ज्ञान राख्छिन् । उनको विचारमा पोखराको नेतृत्व गर्नेले पर्यटनलाई मुख्य ध्यान दिनुपर्छ । ‘पर्यटनलाई ध्यान दिए अर्थतन्त्र आफैं उकासिन्छ,’ उनले भनिन्, ‘पोखरामा बाह्रै महिना पर्यटक आउने वातावरण बनाउनुपर्छ ।’ त्यसका लागि विज्ञापनमार्फत अन्तर्राष्ट्रिय बजारमा पोखराको प्रचारप्रसार गर्नुपर्ने धारणा उनको छ ।

१३ वर्षको उमेरमै अन्तर्राष्ट्रिय भलिबल खेलेर नेपाललाई पदक दिलाउन सफल यी खेलाडीले खेल क्षेत्रका बारेमा बोल्न कहाँ छुटाउँथिन् र ? अबका मेयर र उपमेयरले खेललाई दोस्रो प्राथमिकतामा राख्नुपर्ने उनले सुझाइन् । भनिन्, ‘पोखरा रंगशालाको उचित व्यवस्थापन र खेलकुद प्रतिष्ठान बनाएर खेलाडी उत्पादन गर्ने कार्य गरिनुपर्छ ।’

खेलपछि तेस्रो प्राथमिकता सार्वजनिक यातायात हुनुपर्ने उनी बताउँछिन् । अस्तव्यस्त भएकै कारण विद्यालय जीवनपछि सार्वजनिक यातायातमा नचढेको उनले खुलाइन् । ‘युवाले पनि सार्वजनिक यातायात चढ्ने वातावरण बनाउनुपर्छ,’ उनले भनिन्, ‘१५ रुपैयाँ तिरे पुग्ने ठाउँमा ट्याक्सीलाई ४ सय रुपैयाँ बुझाउन कसलाई रहर हुन्छ र ?’


प्रकाशित : वैशाख २५, २०७४ ११:०८
ADVERTISEMENT
प्रतिक्रिया
पठाउनुहोस्
ADVERTISEMENT

‘गरिबका पक्षमा लड्छु’

कान्तिपुर संवाददाता

सुर्खेत — भेरीगंगा नगरपालिका १० मदाइनचौरकी ३४ वर्षीया चन्द्रकला बादीले उपमेयर पदमा उम्मेदवारी दिएकी छन् । सामान्य आर्थिक अवस्थाकी उनी बिहानदेखि साँझसम्म घरघरै पुगेर भोट मागिरहेकी छन् । ‘वर्षौंसम्म हामी बादी हेपियौं, चेपियौं । यसपटक एउटा भोटलाई नाइँ नभन्दिनुहोला भन्छु,’ उनले मतदाता फकाउने शैली सुनाउँदै भनिन्, ‘चिनेजानेका सबैले सहयोग गर्छु भनेका छन् । अरूले विचार गरम्ला भन्छन् ।’



राप्रपाले चन्द्रकलालाई उम्मेदवार बनाएको हो । ‘बादीकी छोरीले पहिलोपल्ट यति ठूलो पदमा टिकट पाएकी छु,’ चन्द्रकलाले भनिन्, ‘यो नै म र मेरो समुदायका लागि खुसीको कुरा हो । अब उपमेयर जित्नु छ ।’ मुख्य प्रतिस्पर्धी कांग्रेस, एमाले र माओबादी केन्द्रले दलित महिलालाई मेयर/उपमेयर नउठाएकाले गरिबदु:खी र दलितको प्रतिनिधित्व गर्न आफूले जित्नुपर्ने उनले बताउने गरेकी छन् ।

मतदातालाई उति ठूला सपना देखाएकी छैनन् चन्द्रकलाले । नगरपालिकालाई जातीय भेदभाव मुक्त बनाउने, विपन्न समुदायको हितमा काम गर्ने, विपन्न समुदायलाई नि:शुल्क शिक्षा दिलाउन लागि पर्ने योजना सुनाउँछिन् । ‘स्कुलले केके नाममा पैसा उठाउँछ थाहा छैन, गरिबका छोराछोरी ५/६ कक्षा पढेर छाड्नुपर्छ,’ उनले भनिन्, ‘मैले जितें भने गरिबका पक्षमा लड्छु ।’

प्रकाशित : वैशाख २५, २०७४ ११:०८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
×