२६.१२°C काठमाडौं
काठमाडौंमा वायुको गुणस्तर: १५२

तीन वर्षपछि सञ्चालनमा आयो तानसेनको सन्तोष चलचित्र मन्दिर 

माधव अर्याल

तानसेन — तीन वर्षदेखि बन्द रहेको पाल्पाको तानसेनस्थित सन्तोष चलचित्र मन्दिर बुधबारदेखि सञ्चालनमा आएको छ । बन्द भएर गोदाममा परिणत भएको भनिएको सन्तोष चलचित्र मन्दिर पुनः सञ्चालनमा ल्याउन सर्जुमान लिगलले महत्त्वपूर्ण भूमिका खेलेका हुन् । 

तीन वर्षपछि सञ्चालनमा आयो तानसेनको सन्तोष चलचित्र मन्दिर 

यो चलचित्र मन्दिर कोरोना महामारीसँगै २०७६ साल चैत दोस्रो सातादेखि बन्द रहेको थियो । लिगलले स्तरोन्नति गरेर सञ्चालनमा ल्याएका हुन् । तानसेनमा एकमात्र चलचित्र मन्दिर रहेको र अहिले अत्याधुनिक प्रविधि सहित सिट र साउन्ड सिस्टमको व्यवस्थापन गरिएको उनले बताए ।

बुधबार पत्रकार सम्मेलन गरेर पहिलो दिन तीन शो फिल्म सञ्चालन गरिएको छ । लिगलका अनुसार सुविधासम्पन्न हलमा गएर फिल्म हेर्नेहरुका लागि तानसेनमै व्यवस्था गरिएको हो । २ सय सिट क्षमतामा बनाएको यस हलमा पहिलो दिनमै ५ सय बढी दर्शकले हलमा भारतीय फिल्म पठान अवलोकन गरेका छन् ।

११:१५ बजे, २ बजे र ५ बजे हलमा चलचित्र प्रदर्शन गरिनेछ । वि.सं. २०३८ सालमा स्थापना गरिएको यस चलचित्र मन्दिरमा गाउँ–गाउँबाट फिल्म हेर्ने दर्शकहरुको बाक्लो भीड लाग्दथ्यो ।

लिगलका स्वर्गीय बुवा भुयुमान लिगलले सुरुमा हाइभिजन हल र पछि चलचित्र मन्दिरको स्वीकृति लिएर सञ्चालन गरेका थिए । २० वर्षअघिसम्म हलमा टिकटसमेत नपाएर दर्शकहरु फर्किने गर्थे । हलमा पछिल्ला केही वर्षयता दर्शकको संख्या घट्दै गएको थियो ।

प्रकाशित : माघ १२, २०७९ ०८:१२
प्रतिक्रिया
पठाउनुहोस्
जनताको राय

मंसिरदेखि दूधको भुक्तानी नपाएपछि विरोधमा उत्रिएका किसानमाथि प्रहरीले धरपकड गरेकोबारे तपाईंको के टिप्पणी छ ?

x