बर्खास्त भएको केही दिनमै ओपनएआई फर्किए साम अल्टम्यान
काठमाडौँ — बोर्ड सदस्यहरूसँग प्रभावकारी समन्वय गर्न नसकेको भनी आफ्नो पदबाट हटाइएका आर्टिफिसियल इन्टेलिजेन्स कम्पनी ओपनएआईका पूर्व प्रमुख कार्यकारी अधिकृत साम अल्टम्यान पुन: सोही भूमिकामा कम्पनीमा फर्किने भएका छन् । पाँच दिनअघि प्रविधि जगतलाई नै आश्चर्यमा पार्दै आफ्नो नेतृत्व परिवर्तनको घोषणा गरेको ओपनएआईले हाल सामको कम्पनी फिर्तीको घोषणा गरेको छ ।
अल्टम्यानलाई हटाउने निर्णयमा बोर्ड पुगेपछि ओपनएआईका तत्कालिन बोर्ड अध्यक्ष ग्रेग ब्रोकम्यानले पनि आफ्नो पदबाट राजिनामा दिएका थिए । त्यति मात्रै होइन, कम्पनीका सयौं कर्मचारीहरूले अल्टम्यानको बर्खास्तीको विरोधमा राजीनामा दिने दिने बताएका थिए ।
उनको फिर्तीको माग गर्दै निवेदनसमेत दिएका थिए । तत्कालीन बोर्डले अल्टम्यानको ठाउँमा नियुक्त गरेकी मिरा मुरातीसमेत 'आफ्ना कर्मचारी नभएमा ओपनएआई केही रहन्न' भन्ने सन्देशसहित सामलाई फिर्ता बोलाउने अभियानमा मिसिन पुगिन् । यस्ता दबाबपश्चात ओपनएआईले ट्वीचका पूर्वप्रमुख इम्मेट शियरलाई अन्तरिम प्रमुख बनाउने निर्णय गरेको थियो । ओपनएआईको ४९ प्रतिशत शेयर स्वामित्व रहेको माइक्रोसफ्टले भने बर्खास्तीमा परेका अल्टम्यान र ब्रोकम्यान दुवैलाई आफ्नो आर्टिफिसियल इन्टेलिजेन्स ल्याबको नेतृत्व तहमा भर्ती गराउने घोषणा सोमबार गरेको थियो ।
We have reached an agreement in principle for Sam Altman to return to OpenAI as CEO with a new initial board of Bret Taylor (Chair), Larry Summers, and Adam D'Angelo.
— OpenAI (@OpenAI) November 22, 2023
We are collaborating to figure out the details. Thank you so much for your patience through this.
ओपनएआईले अल्टम्यान फर्किने घोषणा गर्दै एक्समा लेखेको छ, 'हामी साम अल्टम्यान प्रमुख कार्यकारी अधिकृतकै रूपमा ओपनएआईमा फर्किने सैद्धान्तिक सहमतिमा पुगेका छौं र अबको बोर्डमा ब्रेट टेलर, ल्यारी समर्स र एडम डिएन्जेलो रहनुहुनेछ ।' टेलर अर्को प्रविधि कम्पनी सेल्सफोर्सका पूर्व प्रमुख हुन् भने समर्स अमेरिकी पूर्वमन्त्री र डिएन्जेलो कोराका संस्थापक हुन् । आफूले ओपनएआईलाई माया गर्ने उल्लेख गर्दै एक्स पोस्टमा साम अल्टम्यानले नयाँ बोर्ड र माइक्रोसफ्ट प्रमुख सत्य नाडेलाको सहयोगमा काम गर्न आफू आतुर रहेको उल्लेख गरेका छन् ।
i love openai, and everything i’ve done over the past few days has been in service of keeping this team and its mission together. when i decided to join msft on sun evening, it was clear that was the best path for me and the team. with the new board and w satya’s support, i’m…
— Sam Altman (@sama) November 22, 2023
'मैले पछिल्ला दिनमा जे गरें त्यो हाम्रो मिशन र टोलीलाई सँगै राखिराख्नको लागि थियो,' सामले लेखेका छन्, 'मैले आइतबार साँझ माइक्रोसफ्टसँग जोडिन गरेको निर्णय पनि म र मेरो टोलीको आगामी दिनलाई हेरेर गरेको थिएँ ।' सामको ओपनएआई फिर्तीको स्वागत गर्दै माइक्रोसफ्ट प्रमुख नाडेलाले पनि यो कम्पनीलाई अझै स्थीर, सुसूचित र राम्रो थितिसहित चलाउने दिशातर्फको पहिलो कदम भएको उल्लेख गरेका छन् । आफ्ना लगानीकर्ताहरू र प्रविधि क्षेत्रका मुख्य व्यक्तित्वहरूका साथै सयौं कर्मचारीले सामको बर्खास्तीमा प्रश्न उठाउँदै ओपनएआईको विकल्प खोज्न शुरू गरेपछि दबाबमा परेको ओपनएआई आफ्नो निर्णय केही दिनमै उल्ट्याउन बाध्य भएको हो ।