नेप्से १८८८ अंकमा ओर्लियो, सबै सूचक घटे
काठमाडौँ — साताको पहिलो दिन आइतबार सेयर बजारको परिसूचक नेप्से १९ सयभन्दा तल ओर्लिएको छ । अघिल्लो कारोबार दिनको तुलनामा परिसूचक २६.८७ घटेर १८८८ अंकमा कायम भएको छ । कुल १ अर्ब २८ करोडको कारोबार भयो । गत बिहीबार १ अर्ब ४१ करोडको कारोबार भएको थियो ।
नेप्से परिसूचकका अलवा सबै सूचक घटेका छन् । बैंकिङ १७, विकास बैंक ५१, फाइनान्स १९, होटल तथा पर्यटन १८, जलविद्युत् २३, जीवन बीमा ८४, उत्पादन ८७, माइक्रोफाइनान्स १३३, निर्जीवन बीमा १०२, ब्यापार ४३ र अन्य उपसमूह ४ अंक घटे । दुई जलविद्युत् कम्पनी मायाखोला र एसियन हाइड्रोको मूल्य १० प्रतिशत बढ्यो । कालिन्चोक दर्शनको ६ र गुराँस लाइफको मूल्य ४.२ प्रतिशत बढ्यो ।
४ लघुवित्त कम्पनीको मूल्य १० प्रतिशत घट्यो । जीवन विकास लघुवित्त, जल्पा सामुदायिक लघुवित्त, युनिक नेपाल र महिला लघुवित्तको मूल्य १० प्रतिशत घट्यो । किसान लघुवित्तको मूल्य ८.८ प्रतिशत घट्यो । कारोबार रकमका आधारमा हिमालयन डिस्टिलरी, एनआईसी एसिया बैंक, नेस्डो लघुवित्त, नबिल बैंक र शिवम् सिमेन्ट त्रमशः अगाडि रहे ।
