राष्ट्रिय प्रसारणमा जोडियो ४४ मेगावाटको सुपर मादी
गण्डकी — कास्कीको मादी गाउँपालिकामा निर्मित सुपर मादी जलविद्युत् आयोजनाको ४४ मेगावाट विद्युत् शनिबारदेखि राष्ट्रिय प्रसारण लाइनमा जोडिएको छ । बाँधदेखि विद्युत्गृहसम्म जडित उपकरणलगायत सम्पूर्ण पक्ष (ड्राई अर्थात् पानी नहाली र वेट अर्थात् पानी हालेर) को परीक्षण सफल भएपछि शनिबारदेखि आयोजनाले विद्युत्को परीक्षण उत्पादन थालेको हो । उत्पादित बिजुली १९ किमि टाढा रहेको लेखनाथ सबस्टेसनमा लगेर जोडिएको छ ।
बिजुली १५ दिन परीक्षणस्वरूप नेपाल विद्युत् प्राधिकरणलाई निःशुल्क उपलब्ध हुनेछ । त्यसपछि भने आयोजनाले व्यावसायिक उत्पादन गर्नेछ । आयोजना निजी क्षेत्रबाट निर्मित दोस्रो ठूलो रहेको सञ्चालकको दाबी छ । यसअघि सोलुखुम्बुमा ८६ मेगावाटको दूधकोशी आयोजना बनिसकेको छ । मादी गाउँपालिका–१ र २ सीमास्थित मादी नदीको पानी मादी–२ सोंधास्थित विद्युत्गृहमा पुर्याइएको छ ।
०७५ मंसिरबाट आयोजना निर्माणको काम सुरु भएको थियो । आयोजना ८ अर्ब ७० करोड रुपैयाँ लागतमा निर्माण सकिएको सुपर मादी हाइड्रोपावर लिमिटेडका सञ्चालक पुष्पज्योति ढुंगानाले जनाए । २ अर्ब १० करोड इक्विटी पुँजी र बाँकी सानिमा बैंकको अगुवाइमा राष्ट्रिय वाणिज्य बैंक, कुमारी बैंक, कृषि विकास बैंक, एभरेस्ट बैंकलगायतले व्यवस्थापन गरेका छन् । संस्थापक सेयर १४ करोड र स्थानीयको आईपीओसहित गरी २५ करोड सेयर रहेको ढुंगानाले जनाए । एक हजार ३ सय जनाभन्दा बढी स्थानीयको आईपीओ छ ।
आयोजनाको सिभिलतर्फको निर्माणको ठेक्का फेवा कन्स्ट्रक्सनले पाएको थियो । मेकानिकल ठेक्का भने माछापुच्छ्रे मेटल एन्ड मेसिनरी प्रालि पोखराले हेरेको थियो । मुख्य उपकरण भने चीनबाट ल्याइएको हो । आयोजनाको मुख्य सुरुङको लम्बाइ ६ किमि छ । इन्टेक र पेनस्टक पाइप रहेको स्थान झन्डै एक किमि छ । विद्युत्गृहमा तीन वटा टर्बाइन जोडिएको छ । भौगोलिक अवस्था कमजोर भएपछि ८ सय मिटरको पेनस्टक पाइप सुरुङभित्र जडान गरिएको छ ।
पेनस्टक पाइप राख्दा २५ करोडको लागत बढेको सञ्चालक ढुंगानाले बताए । आयोजनाबाट वार्षिक २४२.६५ गिगावाट घण्टा विद्युत् उत्पादन हुनेछ । ठेक्का सम्झौताअनुसार ०७८ चैतभित्र विद्युत् उत्पादन गर्ने तालिका रहे पनि आयोजना निर्माण सकाउन एक वर्षभन्दा बढी समय लागेको हो । ‘कोरोना महामारी र रुस–युक्रेन युद्धका कारण पनि समय र लगानी केही बढी लाग्यो,’ ढुंगानाले भने । ०७८ असार १ मा मादी नदीमा आएको बाढीले आयोजनामा क्षति पुर्याएको थियो । बाढीले आयोजना निर्माणका उपकरण बगाउनुका साथै निर्मित संरचनामा क्षति पुर्याएपछि आयोजना निर्माणको लागत बढेको हो । बाढीबाट त्यस बेला १ अर्ब रुपैयाँभन्दा बढीको क्षति पुगेको थियो ।
उत्पादित बिजुली १९ किमि टाढाको लेखनाथ सबस्टेसनमा जोडिएको छ । यसका लागि आयोजनाले एकल रूपमा १९ र यसअघि बनिसकेको अपरमादी जलविद्युत् आयोजनासँग मिलेर बनाइएका ३१ गरी ५० वटा टावरमार्फत लेखनाथ पुर्याइएको छ । हाइड्रोले वार्षिक १ अर्ब ३० करोड रुपैयाँ बराबरको व्यापार गर्ने ढुंगानाले जनाए । हाइड्रो निर्माणमा प्रतिदिन ७ सयभन्दा बढी जनशक्ति लगातार काममा थिए । अब भने ३५ जनाले नियमित रोजगारी पाउनेछन् । हाइड्रो निर्माणका बेला गरिएको पीपीए सम्झौताअनुसार चैतमा १३ मेगावाट बिजुली उत्पादन गर्ने भनिए पनि हाल १५ मेगावाट उत्पादन गरी प्राधिकरणलाई दिइएको छ ।
प्रकाशित : चैत्र १२, २०७९ ०७:१०
