‘फोन-पे’ मार्फत इन्टरनेटबिनै भुक्तानी गर्न सकिने
काठमाडौँ — फोन-पे एपमार्फत इन्टरनेटबिना पनि भुक्तानी गर्न सकिने भएको छ । यसअघिसम्म इन्टरनेटमार्फत मात्र कारोबार हुँदै आएको फोन पेले अब इन्टरनेटबिनै पनि कारोबार गर्न मिल्ने फिचर थपेको हो । गत साता राष्ट्र बैंककी डेपुटी गभर्नर निलम ढुङ्गानाले उक्त सुविधाको शुभारम्भ गरेकी हुन् । यो फोन पेले बजारमा ल्याएको नयाँ फिचर हो । यो सुविधाले डिजिटल भुक्तानीलाई ग्राहक र व्यवसायीहरूका लागि अझै सरल, छिटो र सुरक्षित बनाउने दाबी कम्पनीले गरेको छ ।
कार्यक्रममा फोन पेको आफलाइन फिचरमार्फत धेरै ग्राहकले सुविधा पाउने डेपुटी गभर्नर ढुंगानाले बताइन् । ‘यो नविनतम सोचका लागि सम्बद्ध सबैलाई धन्यवाद र शुभकामना दिन चाहन्छु,’ उनले भनिन्, ‘क्यूआरको लोकप्रियता दिन प्रतिदिन बढ्दै गइरहेको परिप्रेक्ष्यमा फोन पेको आफलाइन फिचर कोशेढुंगा सावित हुनेमा म विश्वस्त छु ।’
फोन पेको यस फिचरमा ग्राहकले इन्टरनेटको प्रयोग बिनाभुक्तानी गर्न मिल्छ । तसर्थ यसले देशको ठूलो जनसंख्यालाई डिजिटल भुक्तानी गर्न प्रेरित गर्छ र राष्ट्र बैंकको नगदरहित कारोबार बनाउने अभियानलाई पनि साकार पार्न सहयोग पुग्ने कम्पनीको दाबी छ ।
फोन पेले विगत ३ वर्षदेखि डिजिटल भुक्तानीको क्षेत्रमा काम गर्दै आइरहेको छ । फोन पेमा अहिलेसम्म १ करोड ६० लाख प्रयोगकर्ता छन् । ११ लाखभन्दा बढी व्यवसाय तथा ६० भन्दा बढी बैंक तथा वित्तीय संस्थाहरू आबद्ध रहेको फोन पेको विज्ञप्तिमा उल्लेख छ ।
प्रकाशित : माघ २३, २०७९ १७:२९
