काठमाडौँ — राष्ट्रिय योजना आयोगका पूर्व उपाध्यक्ष गोविन्दराज पोखरेलले लुम्बिनी प्रदेशमा पर्यावरणीय पर्यटनको धेरै सम्भवना रहेको बताएका छन् । कान्तिपुर मिडिया ग्रुपद्वारा आयोजित लुम्बिनीको सामर्थ्यअन्तर्गत 'अर्थतन्त्रका अवरोध' सत्रमा बोल्दै पोखरेलले बाँके र बर्दिया अबको पर्यावरणीय पर्यटन सम्भावनायुक्त निकुञ्ज रहेको बताएका हुन् ।

'अब चितवनको सट्टा बाँके र बर्दियामा पर्यावरणीय पर्यटनको धेरै सम्भवाना छ,' उनले भने,'वातावरणीय पर्यटन हेर्ने हो भने हाम्रो देशमा निकुञ्ज हेर्न अब चितवन होइन, बाँके र बर्दियामा पर्यटक जान्छन् । यी क्षेत्रमा सम्भावना ल्याउन सकिन्छ ।'

उनले लुम्बिनी जनशक्ति पनि धेरै भएको प्रदेश भएकाले सिप र क्षमता वृद्धिका लागि जोड दिएर उत्पादनमूलक कार्यमा प्रयोग गर्नुपर्नेमा जोड दिए । उनले भने,' द्वन्द्वबाट पिल्सिएका ठूलो युवा समूहहरु छन् । यो प्रदेशको सबैभन्दा बढी सम्भावना भनेको जशक्ति हो । ह्यमुन रिसोर्सको क्षमता वृद्धिका लागि सिप दिन सकिएको छैन । सिप दिन जरुरी छ ।'

सिमेन्ट, स्टिलजस्ता उत्पादन लुम्बिनी प्रदेशको अर्को सम्भावना रहेको उनले औंल्याए । प्रदेश र स्थानीय सरकारले दिने अनुदान पारदर्शी गर्नुपर्नेमा उनले जोड दिए । यस्तै लुम्बिनी प्रदेशले दक्षिणको बजार र उत्तरको ऐतिहासिक चिजलाई जोड्न सक्ने सम्भावना रहेको बताए । नेपालगन्जको एयरपोर्टलाई हुम्ला र भैरहवाको एयरपोर्टलाई मुस्ताङसँग जोड्न सके धेरै सम्भावना रहेको बताए । उनले तातो क्षेत्र र चिसो क्षेत्रको बजारमा धेरै सम्भावना रहेको बताए ।

पोखरेलले मेहनती, परिश्रमी, उद्यमशील मानिसलाई राम्रो भनेर भाष्य निर्माण गर्नुपर्ने बताए । ' पैसा कमाउने र सम्पत्ति कमाउने मानिसहरुलाई यो समाजमा सरकारले पाल्नु नपर्ने तर सरकारलाई पाल्ने मानिसहरु भएकाले त्यो भाष्य निर्माण गर्न जरुरी छ । त्यो भाष्यले अझै पनि नेपालमा जरा गरेको छैन ।,' उनले भने ।