नेपाल उद्योग परिसंघ (सीएनआई) ले स्थापनादेखि नै नेपालमा औद्योगिक विकासका लागि पहल गर्दै आएको छ । गत वर्ष मंसिरमा आयात बढेर विदेशी मुद्रा संचिति छोटो अवधिमै साढे २ अर्ब डलरले घटेपछि हामी सबैले औद्योगिकरण र आन्तरिक उत्पादनको महत्त्व झन् राम्रोसँग बुझेका छौं ।
नेपाल उद्योग परिसंघले सन् २०२१ देखि सरकारसँगको साझेदारीमा ‘मेक इन नेपाल–स्वदेशी’ बहुवर्षीय अभियान संचालन गरिरहेको छ । घरेलु औद्योगिक उत्पादन वृद्धि गरी नेपाली वस्तु तथा सेवाको पहुँच राष्ट्रिय तथा अन्तराष्ट्रिय बजारमा पुर्याउने यस अभियानको मुख्य लक्ष्य हो । परिसंघले यसै उद्देश्य प्राप्तिका लागि भर्खरै मेक इन नेपाल सम्मेलन सम्पन्न गऱ्यो ।
सन् १९७१ मा पाकिस्तानबाट छुट्टिएर नयाँ मुलुकका रूपमा बंगलादेशको उदय हुँदै गर्दा तत्कालीन अमेरिकी विदेशमन्त्री हेनरी किसिन्जरले बंगलादेश आर्थिक रूपमा स्वतन्त्र मुलुक रहन नसक्ने आकलन गरेका थिए । त्यसको ५० वर्षपछि बंगलादेशले किसिन्जरको त्यो आकलनलाई गलत साबित गरेको मात्रै छैन, एसियाको उदीयमान अर्थतन्त्रको पंक्तिमा आफूलाई उभ्याउन सफल पनि भएको छ ।