नरहरिनाथ साक्षर घोषणा

९८ दशमलव २८ प्रतिशत बासिन्दा साक्षर भएपछि साक्षर पालिका घोषणा गरिएको शिक्षा शाखाका प्राविधिक सहायक अनिता भट्टले बताइन् । उनकाअनुसार नरहरिनाथ कालीकोटका ९ वटा स्थानीय तह मध्ये सबैभन्दा बढी जनसंख्या भएको पालिका हो ।

साविकको लालु, माल्कोट, कुमालगाउ, कोटवाडा र रुप्सा गरी ५ गाविस मिलेर बनेको नरहरिनाथ गाउँपालिकाले यसअघि नै आधारभूत तहमा शतप्रतिशत विद्यार्थी विद्यालय भर्ना गरेर अनिर्वाय तथा आधारभूत शिक्षा सुनिश्चित गाउँपालिका घोषणा गरिसकेको छ ।

शिक्षाविद् विद्यानाथ कोइरालाको सहजीकरणमा शिक्षा योजना बनाएको छ भने बालबालिकाको घरमा पठनपाठन सहज गर्न अभिभावकलाई पढाई कुना पनि निर्माण गर्न लगाएको छ । यहाको वडा ३ लाई एक घर एक पढाई कुना सुनिश्चित वडा घोषणाको तयारी पनि भइरहेको गाउँपालिका अध्यक्ष नगेन्द्रबहादुर विष्टले बताए । योगी नरहरिनाथको जन्मथलो पनि यही हो । कालीकोटको जिल्ला साक्षरता समन्वय समितिको निर्णयअनुसार ०८० भित्रै सबै स्थानीय तहलाई साक्षर घोषणा गर्ने भनिएको थियो । समितिले यसै आर्थिक वर्षभित्र जिल्ला साक्षर घोषणा गर्ने लक्ष्य छ । नरहरिनाथमा एक क्याम्पस, १० माध्यमिक विद्यालय, ३८ आधारभूत विद्याल्य र ४२ वटा बालविकास केन्द्र छन् भने ५ वटा सामुदायिक सिकाई केन्द्र छन् ।