सुडानका दुई सुरक्षा निकायबीचको झडपमा कम्तीमा ५६ जनाको मृत्यु

मृत्यु हुनेमा १७ जना सैनिक रहेको सुडानको चिकित्सक संगठनले जनाएको छ ।

खार्तुममा विस्फोट र गोलाबारीको आवाज सुनिएको त्यहाँका स्थानीयले बताएका छन् । सेना र र्‍यापिड सपोर्ट फोर्स (आरएसएफ) बीच झडप भएको हो । आरएसएफ र सेनाले राष्ट्रपति रहने क्षेत्र‚ खार्तौम विमानस्थल र अन्य महत्त्वपूर्ण क्षेत्र आफ्नो नियन्त्रणमा रहेको दाबी गरेका छन् । उक्त आरोपको खण्डन गर्दै शनिबार त्यहाँको सेनाले ओमदुर्मानमा रहेको आरएसएफको बेसक्याम्प रहेको क्षेत्रमा एयरस्ट्राइक प्रहार गरेको थियो । उक्त स्ट्राइकपछि दुवै पक्षबीच गोली हानाहान भएको थियो । आक्रमण गर्नुपूर्व त्यहाँको सेनाले शनिबार नागरिकलाई घरबाट बाहिर ननिस्कन सूचना जारी गरेको थियो ।

सुडानस्थित चिकित्सक संगठनका अनुसार उक्त झडपमा परी खार्तौम विमानस्थलमा २ सहित ५६ जनाको मृत्यु भएको छ । बीबीसीका अनुसार आरएसएफ र सेनाबीच भएको दोहोरो भीडन्तमा परी संयुक्त राष्ट्रसंघ र विश्व खाद्य संगठनका लागि काम गर्दै आएका ३ जनाको पनि मृत्यु भएको छ । सन् २०२१ मा सैन्य कु भएपछि आर्मीले नै त्यहाँको राज्य सञ्चालन गर्दै आएको छ । सन् २०२१ अक्टुबर २५ मा सुडानी मिलिटरी जनरल अब्देल फत्ताह अल-बुरहानले सत्ता आफ्नो हातमा लिएपछि सुडानको राज्य सञ्चालन त्यहाँको सेनाले गर्दै आएको छ ।

सुडानको खार्तौममा मानिसहरू भागाभाग गरेको दृश्य अहिले समाजिक सञ्जालमा भाइरल छ । बीबीसीका अनुसार अझै पनि गोलीका आवाजहरू सुनिइरहेका छन् । ‘गोलाबारी अझै चलिरहेको छ । सबै मानिसहरू घरभित्रै बसिरहेका छन् । यहाँ एकदम डरलाग्दो र दर्दनाक छ‚’ स्थानीयको भनाइ उद्धृत गर्दै बीबीसीले लेखेको छ ।

बेलायत‚ अमेरिका‚ युरोपेली संगठन‚ चीन र रुसले यो दुई सेनाबीच भएको तत्काल रोकिनुपर्ने बताएका छन् ।

झडपको कारण के हो ?
सन् २०२१ मा सैन्य कु भएसँगै काउन्सिल अफ जनरलले राज्य सञ्चालन गर्दै आएको छ । सोही बिच राज्यकै अर्को सुरक्षा निकायको रुपमा रहेको आरएसएफ र सेनाबीच विवाद चल्दै आएको छ ।

सुडानका उपनेता एवं आरएसएफका नेता जनरल मोहमद हामदान डागालो र मिलिटरी जनरल अब्देल फत्ताह अल-बुरहानबीच देश सञ्चालनको विषयमा केही समयदेखि विवाद चर्किरहेको थियो । १ लाख आरएसएफ सैनिकलाई सेनामा आबद्ध गर्नुपर्ने विषय नै यो विवादको प्रमुख कारण भएको बताइएको छ ।

कसरी सुरु भएको थियो झडप ?

आरएसएफका सदस्यहरूलाई देशका विभिन्न स्थानमा परिचालित गर्ने निर्णयले शनिबारको झडप सिर्जना गरेको अन्तर्राष्ट्रिय समाचार संस्थाहरूले उल्लेख गरेका छन् । आरएसएफका सदस्यहरू परिचालित गर्ने क्षेत्रलाई त्यहाँको सेनाले थ्रेटको रुपमा हेरेको बताइएको छ । शनिबार बिहान भएको गोली हानाहानमा सुरुमा कसले गोली चलाएको थियो भन्नेबारे भने अझै यकिन नभएको बीबीसीले उल्लेख गरेको छ । कूटनीतिज्ञहरूले भने दुवै पक्षलाई वार्ताबाट समाधान खोज्न आग्रह गरेका छन् ।