भारतीय ट्याक्सी रोकिएपछि मैत्री बसमा अवरोध
कञ्चनपुर — महेन्द्रनगरदेखि भारतको राजधानी दिल्ली र देहरादुनसम्म चल्ने नेपाल–भारत मैत्री बस सञ्चालनमा भारतीय ट्याक्सी व्यवसायीले अवरोध गरेका छन् । उनीहरूले नेपाल–भारत सीमानजिकै शारदा ब्यारेजमा नेपाली नम्बरका बस रोकेर बिहीबार अवरोध गरे ।
हरेक दिन साँझ महेन्द्रनगरबाट दिल्ली र देहरादूनका लागि नेपाली र भारतीय नम्बरका बसहरू छुट्ने गर्छन् । बिहीबार नेपाली नम्बरका बसहरू झन्डै चार घण्टा शारदा ब्यारेजमै रोकिएका थिए । अबेर रातीमात्रै बसहरू गन्तव्यतिर लागेका थिए ।
स्थानीय प्रशासनले मनपरी ढंगले चलिरहेका भारतीय नम्बरका ट्याक्सीहरूमा रोक लगाएपछि तिनै ट्याक्सी व्यवसायीले मैत्री बसमा अवरोध गरेका हुन् । प्रशासनले चैत १ देखि सुविधाको भरमा मनपरी ढंगले चलिरहेका ट्याक्सीमा रोक लगाएको हो । ‘भारतीय नम्बरका ट्याक्सीमा रोक लगाएपछि उनीहरूले बसमा अवरोध गरेका हुन्,’ महाकाली यातायात प्रालिका अध्यक्ष डम्मरराज पन्तले भने, ‘छलफलपछि केही सहज भएको छ, अव रोकिदैन होला ।’ ट्याक्सीको विषयमा केही गलत बुझाइका कारण मैत्री बस रोकिएको उनले बताए ।
भारतीय नम्बरका ट्याक्सीहरू सीमा क्षेत्रको नजिकको बजारसम्म सुविधाको भरमा चल्न पाउछन् । भारतीय नागरिक बोकेर भन्सार काटेर जुनसुकै ठाउमा पनि पुग्न सक्छन् । तर नेपाली नागरिक बोकेर सुदूरपश्चिम मात्रै नभई देशभरि नै चलिरहेकाले यसलाई नियन्त्रण गर्न खोजिएको कञ्चनपुरका प्रमुख जिल्ला अधिकारी गोपालप्रसाद अर्यालले बताए ।
भारतीय ट्याक्सी व्यवसायीहरूले निर्वाध रूपमा ट्याक्सीहरू नेपालमा चल्न पाउनुपर्ने माग राखेका थिए । तर नेपालबाट मैत्री बसबाहेक अन्य सवारी साधनहरू व्यावसायिक रुपमा भारततर्फ चल्न पाउँदैनन् । ‘मनपरी ढंगले चलिरहेका भारतीय
ट्याक्सीलाई नियन्त्रण गरिएको हो,’ कञ्चनपुरका प्रमुख जिल्ला अधिकारी अर्यालले भने, ‘उनीहरूले मैत्री बस रोकेको सुनिएको छ, तर आधिकारिक रूपमा जानकारी आएको छैन ।’
अहिले महेन्द्रनगरबाट भारतको राजधानी दिल्ली र उत्तराखण्डको राजधानी देहरादूनसम्म नियमित रूपमा मैत्री बस सेवा सञ्चालनमा छ । रोजगारीका लागि भारत जाने नेपाली कामदारहरूलाई यसले निकै सहज भएको छ । दैनिक ६ वटा नेपाली र ६ वटा भारतीय बसहरू महेन्द्रनगरबाट दिल्ली र देहरादूनका लागि जाने गरेका छन् । महेन्द्रनगरदेखि दिल्लीसम्म दिवा सेवा पनि सञ्चालनमा छ ।
नेपाल र भारतबीच मैत्री बस सेवा सञ्चालन गर्ने सहमतिपछि सन् २०१५ देखि महेन्द्रनगरबाट मैत्री बस सेवा सञ्चालन हुँदै आएको छ । भारतको उत्तर प्रदेश परिवहन र उत्तराखण्ड परिवहनसंँग सम्झौता गरेर मैत्री सेवा सञ्चालन भइरहेको महाकाली यातायात प्रालिका अध्यक्ष पन्तले बताए । कोरोना संक्रमणका बेला दुई वर्ष रोकिएको उक्त सेवा गतवर्षदेखि पुनः सञ्चालन भएको हो ।
प्रकाशित : चैत्र ५, २०७९ ०७:५७
