२१.१२°C काठमाडौं
काठमाडौंमा वायुको गुणस्तर: १६७

छाडा चौपायालाई यातना दिइएको भन्दै भ्रम फैलाइयो : सिद्धार्थनगर नगरपालिका

माधव ढुंगाना

भैरहवा — सिद्धार्थनगर नगरपालिकाले सडकमा छाडिएका छाडा चौपायाहरूलाई यातना दिइएको भन्दै भ्रम फैलाइएको बताएको छ । नगरका छाडा चौपायालाई नियन्त्रण गर्ने नाममा नगरपालिकाका कर्मचारीले अमानवीय ढंगले यातना दिएको भनी विभिन्न सामाजिक सञ्जालबाट भाइरल बनाइएको विषयप्रति नगरपालिकाले कुनै यातना नदिइएको दाबी गरेको हो ।

छाडा चौपायालाई यातना दिइएको भन्दै भ्रम फैलाइयो : सिद्धार्थनगर नगरपालिका

नगरका छाडा गाईगोरुलाई नियन्त्रण गर्ने क्रममा बुधबार साँझ एउटा गोरुलाई गाडीमा बाँधेर रक्ताम्मे बनाउदै नगरपालिकाका कर्मचारीले क्रूरतापूर्ण ढंगले सडकमा घिसारेको भनी समाजिक सञ्जालमा चर्चित बनाइएको विषयप्रति नगरपालिकाले बिहीबार पत्रकार सम्मेलन गरी कुनै यातना नदिइएको बताएको हो ।

उक्त गोरुलाई नियन्त्रणमा लिने क्रममा यातना दिइएको भन्दै केही व्यक्तिले सामाजिक सञ्जालमा अफवाह फैलाएको भन्दै बिहीबार अपराह्न नगरको एउटा समूहले नगरपालिका र जनप्रतिनिधिविरुद्ध नाराबाजी गर्दै जिल्ला प्रशासन कार्यालयमा ज्ञापनपत्रसमेत दिएको थियो ।

राष्ट्रिय प्रजातन्त्र पार्टी लुम्बिनी प्रदेशका अध्यक्ष प्रदीपकुमार उदयले बिहीबार नै प्रेस विज्ञप्ति जारी गर्दै हिन्दूहरूको आस्थाको प्रतिक गाईलाई अमानवीय ढंगले जिउँदै रक्ताम्मे हुने गरी घिसारिएको कार्यप्रति ध्यानाकर्षण भएको र हिन्दूहरूको आस्थामा गम्भीर चोट पुगेको जनाएका थिए ।

नगरपालिकाले भने उक्त साँढेलाई नियन्त्रणमा लिएर क्वारेन्टिनमा लैजान गाडीमा डोरीले बाँधेर डोर्‍याएर लैजाने क्रममा साढे सडकमा अचानक बसेको र तत्कालै गाडी ब्याक गरी डोरी फुकाइएपछि साँढे उठेर अन्यत्र लागेको भनी सीसी टीभी फुटेज सार्वजनिक गरेको थियो । उक्त फुटेजमा साँढेलाई यातना दिइएको तथा घिसारिएको देखिएको छैन न त कुनै अंगमा चोटपटक लागेर रगत आएको दृष्य नै । नगरपालिकाले उक्त साँढे बिहीबार स्वतन्त्र रुपमा खेलिरहेको भिडियो पनि सार्वजनिक गरेको थियो ।

सिद्धार्थनगरका नगरप्रमुख इश्तियाक अहमद खानले नगरका कुनै पनि छाडा गाईगोरुलाई नियन्त्रणमा लिने क्रममा कुनै पनि अमानवीय व्यवहार नगरिएको जनाउँदै नियन्त्रणमा लिइएको गाईगोरुलाई पनि उचित व्यवस्थापनका साथ राखिएको बताए ।

प्रकाशित : पुस २१, २०७९ १८:१६
प्रतिक्रिया
पठाउनुहोस्
जनताको राय

स्वयंसेवी संस्था स्काउटको स्वामित्वमा रहेको सार्वजनिक जग्गा कब्जा गरी वर्षौंदेखि भाडामा लगाउने कांग्रेसका सांसद दीपक खड्कालाई अब के गर्नुपर्छ ?