रौतहटमा श्रीमान्‌द्वारा श्रीमतीको हत्या 

वृन्दावनको बलरी गाउँस्थित तामाङ टोलका ४० वर्षीय तीर्थ वाइबाले हँसियाले गर्धनमा प्रहार गर्दा श्रीमती ३५ वर्षीया सोतीमाया वाइबाको घटनास्थलमै मृत्यु भएको इलाका प्रहरी गरुडाका डीएसपी ओम खनालले जानकारी दिए । वाग्मती बगरमा घाँस काट्न गएका बेला दुवैबीच विवाद भएको थियो । अत्यधिक मादक पदार्थ सेवन गरेका वाइबाले श्रीमतीको हत्या गरेको भन्दै गाउँमा हल्ला गरेका थिए ।

उनी आफैले पनि घाँटी रेटेर आत्महत्या गर्न लागेको अवस्थामा फेला पारेको प्रहरीले बतायो । वाइबाको घाँटीमा गम्भीर चोट छ । उनको चन्द्रनिगाहपुरस्थित सिभिल अस्पतालमा उपचार भइरहेको छ । डीएसपी खनालले घटनाबारे अनुसन्धान भइरहेको बताए ।