लिफ्टिङ खानेपानी आयोजना गुणस्तरहीन
खोटाङ — दिक्तेल रुपाकोट मझुवागढी नगरपालिका–१५ विजयखर्कमा सञ्चालित साप्सुखोला–विजयखर्क–बसेरी लिफ्टिङ खानेपानी आयोजनाको काम गुणस्तरहीन भएको खुलेको छ । चौतर्फी गुनासोपछि अनुगमन गरिँदा यो यथार्थ बाहिर आएको हो ।
नेपाल सरकार, संघीय खानेपानी मन्त्रालयको २९ करोड १३ लाख ९९ हजार ९ सय ९० रुपैयाँको लागतमा उक्त वडाका ५ सय २३ घरधुरी उपभोक्तालाई खानेपानी पुर्याउन आयोजना सञ्चालन गरिएको हो । उक्त आयोजनाको ठेक्का सगरमाथा ड्रिलिङ एन्ड कन्स्ट्रक्सन कम्पनी प्रालि बूढानीलकण्ठ–८ काठमाडौंले लिएको हो ।
उक्त कम्पनीले २०८१ साउन ४ भित्र सक्ने गरी २०७९ असार २२ गते सम्झौता गरेको थियो । साप्सु खोलाबाट लिफ्टिङ गरेर खानेपानी वितरण गर्न उक्त आयोजना ल्याइएको हो । वितरण लाइनको पाइप तीन फिट गहिरो खाल्डो खनेर बिछ्याउनुपर्नेमा दुई फिट मात्रै खनेर पुरिएको, पानी वितरण गर्ने ट्यांकीको कामै नसकी चिरिएको लगायतका कैफियत फेला परेको नगरपालिकाका प्रमुख तीर्थराज भट्टराईले बताए ।
अहिले उक्त आयोजनाको मेनलाइनको ट्यांकी निर्माण र वितरण लाइनको पाइप बिछ्याउने कामहरू भइरहेको छ । स्वास्थ्य चौकीडाँडामा निर्माणाधीन मेन लाइनको २० हजार लिटर क्षमताको ट्यांकी गुणस्तरहीन छ । त्यसभन्दा मुनिको ट्यांकी पनि बांगो देखिएको छ । स्वास्थ्य चौकीडाँडाभन्दा माथिल्लो ट्यांकी चिरा परेकाले भत्काएर बनाउन निर्देशनपछि बुधबार भत्काइएको भट्टराईले बताए । उक्त आयोजनामा ७ सय २५ वटा धारा बनाइनेछन् ।
प्रकाशित : चैत्र ४, २०७९ ०८:२६
