हिउँको पिच, हेर्दा सुन्दर तर हिँड्न कठिन [फोटोफिचर]
जुम्ला — जुम्लाको सदरमुकाम खलंगादेखि पातारासी गाउँपालिका जाने सडकमा हिउँ जमेर पिच जस्तै बनेपछि यात्रा निकै असहज बनेको छ । पातारासीको उर्थुचौताराको उकालो काटिसकेपछि गाउँपालिका केन्द्र जोड्ने सडकमा हिउँ जमेर ओहोरदोहोर गर्न असहज बनेको हो ।
बीच सडकमै हिउँ जमेर चिप्लो बरफ बनेपछि गाडी गुडाउँदा पनि चिप्लिन थालेपछि यात्रा जोखिमयुक्त बनेको छ । जुम्ला पातारासी गाउँपालिकाका स्थानीयहरू तीन महिना देखि नै हिउँको पिचमा यात्रा गर्न बाध्य छन् । पहिले सडकमा आएको पानीले बरफ जमेको सडकमा हिमपात भएपछि सडक पूरै हिउँले ढाकिएको छ । सेताम्ये हिउँ सुन्दर देखिए पनि पैदल हिँड्ने र सवारी कुदाउनेहरूलाई भने कठिन यात्रा भएको स्थानीयहरू बताउँछन् । जसकारण ठूला मालवाहक गाडी चल्न सकेका छैनन् । मोटरसाइकल र साना सवारीका लागि भने जोखिमपूर्ण यात्रा गर्नु परेको छ । हिउँमा यात्रा गर्दा अहिलेसम्म २ दर्जनभन्दा बढी मोटरसाइकल चिप्लिएर क्षति पुगेको स्थानीयहरूले बताएका छन् ।
यसैबीच पातारासीका बासिन्दाहरूले तत्काल बरफमाथि माटो राखेर भए पनि यात्रा सहज बनाउन आग्रह गरिरहेका छन् । पातारासी ३ का भक्तबहादुर बुढाका अनुसार पातारासीको उर्थुचौताराको उकालो काटिसकेपछि हिउँ जमेर पिच जस्तै बनेको छ । जहाँ प्राय: घाम नलाग्ने हुँदा तत्काल हिउँ पग्लिने अवस्था नरहेको बुढाले बताए ।
