‘प्रधानमन्त्री नपाए दिल्ली जानू’
काठमाडौँ — प्रधानमन्त्री पुष्पकमल दाहाल गैरजिम्मेवार अभिव्यक्तिले फेरि विवादमा परेका छन् । आफूलाई प्रधानमन्त्री बनाउन व्यवसायी प्रितम सिंहले धेरै मिहिनेत गरेको र दिल्लीसमेत धाएको दाहालले बताएका हुन् । देशका प्रधानमन्त्रीको भनाइ मान्ने हो भने प्रधानमन्त्री बन्न जनताको घरदैलो होइन, दिल्ली धाउनुपर्छ ।
नेपालमा पहिलो पटक ट्रक ल्याएका सरदार समुदायका प्रितम सिंहमाथि किरणदीप सन्धुले लेखेको पुस्तक ‘रोड्स टु द भ्याली : द लिगेसी अफ सरदार प्रितम सिंह इन नेपाल’ विमोचन कार्यक्रममा दाहालले विवादास्पद अभिव्यक्ति दिएका थिए । ‘उहाँ (सिंह) ले एक पटक मलाई प्रधानमन्त्री बनाउन धेरै मिहिनेत गर्नुभयो । धेरैचोटि दिल्ली जानु पनि भयो । काठमाडौंमा नेताहरू–साथीहरूसँग लगातार छलफल गर्नुभयो,’ दाहालको भनाइ थियो ।
दाहालले यसो भन्दा नेपालका लागि भारतका राजदूत नवीन श्रीवास्तव पनि कार्यक्रममै उपस्थित थिए । ‘प्रधानमन्त्री बन्न दिल्ली निर्णायक’ भन्ने सन्देशसहित प्रधानमन्त्रीले दिएको सार्वजनिक अभिव्यक्तिलाई विश्लेषकहरूले दुर्भाग्यपूर्ण भनेका छन् । भारतका लागि पूर्वराजदूत नीलाम्बर आचार्य संसद्बाट विश्वास पाएको प्रधानमन्त्रीले जनादेश बिर्सनु गलत भएको बताउँछन् । ‘प्रधानमन्त्री कसले बनाउने ? प्रतिनिधिसभाको बहुमतअनुसार प्रधानमन्त्री निर्वाचित हुने हो । प्रधानमन्त्री बन्न भारतको अनुहार हेर्ने प्रवृत्ति ठीक होइन,’ उनको भनाइ छ ।
राजनीतिशास्त्री हरि शर्मा प्रधानमन्त्री दाहाल पहिले बोलेर पछि पछुताउने नेतामा पर्ने टिप्पणी गर्छन् । यस्ता अराजनीतिक अभिव्यक्तिले व्यक्ति र राष्ट्रकै गरिमा घटाउने उनको भनाइ छ । भन्छन्, ‘यो अभिव्यक्तिले राष्ट्रको गरिमा होचो बनाउने काम गरेको छ, उहाँको मनमा धेरै उथलपुथल होला तर मुलुकको प्रधानमन्त्रीबाटै यस्तो गैरराजनीतिक अभिव्यक्ति आउनु हुँदैन ।’
विपक्षी दल एमालेका प्रचार विभाग प्रमुख राजेन्द्र गौतमले प्रधानमन्त्री निर्वाचित हुने व्यवस्था संविधानमा उल्लेख भएकाले बाह्य शक्तितिर संकेत गर्नु आपत्तिजनक भएको बताए । ‘उहाँलाई प्रधानमन्त्री हुन कसले के गुण लगाएको छ, अझै खुलाउँदै जानुहोला,’ उनले भने, ‘सार्वभौम जनताबाट निर्वाचित सांसदले चुनेको प्रधानमन्त्रीबाट यस्तो अभिव्यक्ति आउनु नैतिक र संवैधानिक हिसाबले गम्भीर विषय हो ।’
माओवादीकै एक पदाधिकारीले पनि प्रधानमन्त्री दाहालको भनाइ गलत भएको बताए । ‘राष्ट्रिय स्वाधीनताको प्रश्न उठिरहेका बेला आफूलाई प्रधानमन्त्री बनाउन एक व्यवसायी भारत गएको अभिव्यक्ति दिनु ठीक भएन,’ उनले भने, ‘प्रधानमन्त्रीले कतिबेला के बोल्ने भनेर तयारी गर्नुपर्थ्यो, यसो हुन नसक्नु दुःखद हो ।’
प्रधानमन्त्रीका स्वकीय सचिव रमेश मल्लले भने ‘उहाँ (दाहाल) प्रधानमन्त्री हुनुपर्छ भनेर (प्रितम सिंह) ले धेरैसँग कुरा गरेको’ विषय उद्धरण मात्र गरिएको बताए । ‘प्रधानमन्त्रीज्यूले प्रितम सिंहको भनाइ सुनाउनुभएको मात्र हो,’ उनले भने, ‘कोही व्यक्ति दिल्ली दौडेर कसैलाई प्रधानमन्त्री बनाउन सक्ने हो र ?’
प्रकाशित : असार २०, २०८० ०७:०७