नेता र जनताले संघीयता बुझेनन्ः शशांक

रासस/याेन्हाप

चितवन — कांग्रेस महामन्त्री शशांक कोइरालाले नेता र जनताले संघीयताका बारेमा बुझ्न नसक्दा यसको कार्यान्वयनमा समस्या देखिएको बताएका छन् । 

शनिबार चितवनमा पत्रकारसँग कुराकानी गर्दै उनले संविधानमा व्यवस्था भएअनुसार संघीय सरकारले प्रदेशलाई अधिकार प्रत्यायोजन गर्न नसकेको बताए । उनले भने, 'संघीयताका विषयमा सरकार, राजनीतिक दलका नेता र आम जनताले अझै बुझ्न सकेका छैनन् ।' एक/दुईवटा निर्वाचनपछि संघीयता कार्यान्वयन सहज भएर जाने पनि उनले बताए ।


महामन्त्री कोइरालाले कांग्रेसले प्रतिपक्षको भूमिका राम्रोसँग निर्वाह गरिरहेको बताए । 'सरकारका काम राम्रोलाई राम्रो र गलतलाई गलत भन्नुपर्छ । कांग्रेस जिम्मेवार प्रतिपक्षी भएकाले सरकारका हरेक गतिविधिलाई नजिकबाट हेरेर मूल्यांकन गर्नेछ,' उनले भने ।


समृद्ध राष्ट्र बनाउने अभियानमा कांग्रेस पहिलेदेखि नै लागिरहेको भन्दै उनले सरकारका समृद्धिका योजनामा आफ्नो पार्टीको सहयोग रहँदै आएको बताए ।


फरक प्रसङ्गमा उनले देशभरका नेता कार्यकर्ताको राय बुझेर आफूले पार्टी सभापतिमा उम्मेदवारी दिने वा नदिने टुङ्गो लगाउने बताए । पार्टीभित्र केही मतभेद रहेपनि त्यसको उचित व्यवस्थापन गरी एकढिक्का भएर जाने उनको भनाइ छ ।

प्रकाशित : भाद्र ३०, २०७५ १५:३४
प्रतिक्रिया
पठाउनुहोस्

किशोरी बलात्कार र हत्या प्रकरण : कञ्चनपुरमा बन्द आह्वान

बजार र यातायात ठप्प
भवानी भट्ट

कञ्चनपुर — बलात्कारपछि हत्या भएकी किशाेरी निर्मला पन्तका हत्यारा पत्ता लगाउन माग गर्दै शनिबार कञ्चनपुर बन्द गरिएको छ । नेपाल विद्यार्थी संघले पूर्व घोषित कार्यक्रम अन्तरगत बजार तथा यातायात बन्द गराएको हो । 

शनिबार यातायात बन्द गराउन भानुचोकमा बसेका नेविसंघ कार्यकर्ता । तस्बिर : भवानी भट्ट

बिहान आंशिक रुपमा यातायात चलेपनि दिउँसो देखि यातायात पूर्ण रुपमा बन्द भएको छ । महेन्द्रनगर बजार क्षेत्र पनि दिनभर बन्द रहेको छ । विद्यार्थीहरुले निर्मलालाई न्याय दिनुपर्ने भन्दै नारावाजी र जुलुश समेत निकालेका छन् । नेविसंघले बिहीबारदेखि आन्दोलन सुरु गरेको हो ।

बिहीबार महेन्द्रनगर बजारमा विरोध जुलुश निकालिएको थियो । शुक्रबार यहाँका सरकारी कार्यालय र सरकारी सवारी साधन बन्द गरिएको हो । सरकारी कार्यालय बन्द गराउने क्रममा नेविसंघका ४ जना घाइते भएको नेविसंघका निवर्तमान उपाध्यक्ष केशव जोशीले बताए । उनीहरुले शनिबार कञ्चनपुर बन्द गराएका हुन् ।

नेविसंघसँगै बिभिन्न आमा समूह र स्थानीयले पनि दोषी पत्ता लगाउनुपर्ने माग गर्दै दैनिक रुपमा नारा, जुलुश लगायतका प्रदर्शनहरु गर्दै आएका छन् ।

प्रकाशित : भाद्र ३०, २०७५ १५:२९
पूरा पढ्नुहोस्
प्रतिक्रिया
पठाउनुहोस्
×