गैरसरकारी डाक्टरका भरमा बझाङ

हिमाली जिल्ला बझाङमा डाक्टरको सधैं अभाव रहने गरे पनि विगत तीन वर्षयता निक साइमन्स फाउन्डेसन नामक एक संस्थाको सहयोगमा पठाइएका दुई डाक्टरले जिल्लामा स्वास्थ्य सेवा दिइरहेका छन् । बझाङ अस्पतालमा हालसम्म पनि सरकारी दरबन्दीका डाक्टर आएका छैनन् ।
पाँच वर्ष अवधिका लागि निक साइमन्सले बझाङका लागि दुई डाक्टरलाई संस्थाबाटै सेवासुविधा पाउने गरी खटाएको छ । जिल्लामा सरकारी निकायमा चार जना डाक्टरको दरबन्दी छ तर हालसम्म एक जनामात्र बस्दै आएका छन् ।
उनी जनस्वास्थ्य कार्यालयको प्रमुखसमेत भएकाले बिरामीको उपचारमा समय दिन सकेका छैनन् । जिल्ला अस्पतालमा दुई जना र देउलेख तथा रायल प्राथमिक स्वास्थ्य केन्द्रमा १/१ जना डाक्टरको दरबन्दी भए पनि रायल र देउलेखमा त हालसम्म डाक्टर नै गएका छैनन् । 'बझाङजस्तो विकट जिल्लामा डाक्टर आउन मान्दैनन्,' डा. इन्द्रप्रसाद पौडेलले भने, 'यहाँ निक साइमन्स संस्थाले डाक्टर पठाउँदा जिल्लावासीले स्वास्थ्य सेवा पाएका छन् ।'

प्रकाशित : पुस १६, २०६९ ११:३१